Huygens cheng-chhek-ki

Huygens cheng-chhek-ki sī 1 tâi tùi thài-khong lok ji̍p khì Thó·-chheⁿ oē-chheⁿ Titan tāi-khì-chân ê cheng-chhek ki-khì. I sī Europa Thài-khong Chóng-sú (ESA) ê Cassini-Huygens jīm-bū ê 1 pō·-hūn. In hō chit-ê miâ kì-liām 17 sè-kí ê thian-bûn-ha̍k-ka Christiaan Huygens.

Cassini-Huygens thài-khong-chûn tī 1997 nî 10-goe̍h 15 tùi tē-kiû hoat-siā chhut-khì. Tī 2004 nî 12-goe̍h 25 hit kang, Huygens ê pō·-hūn àn-chiàu kè-e̍k thoat-lî Cassini orbiter, keh-tńg-nî 1-goe̍h 14 sūn-lī kàng-lo̍h tòa Titan bīn-téng, tē-tiám sī Xanadu Regio hù-kīn ê lio̍k-tē. Goân-pún oân-ná ū khó-lū--tio̍h lak tī hái-siōng ê khó-lêng-sèng. Lo̍h-tē liáu-āu, cheng-chhek-ki chiap-sòa hòng-sàng chu-liāu iok-lio̍k 90 hun-cheng kú.