Thó-lūn:Gê-kho châi-liāu-ha̍k

Gê-kho chi̍t-góa-á gōa-lâi-gí sûi-jiân ū Hôa-gí ê hoan-e̍k, m̄-koh tāi-to-sò· ê gê-i-su pēng-bô teh iōng, chió-sò· ê gê-i-su ē ti̍t-chiap sú-iōng piau-chún ê Eng-gí hoat-im lâi kóng, siāng-chē ê lâng sī iōng 1-chióng Tâi-gí khiuⁿ-kháu ê hoat-im lâi kóng. Hó-pí kóng, "resin" Hôa-gí sī "樹脂", tāi-pō·-hūn ê lâng liām "rē-sín" (tiōng-im tī āu-pia̍h); "amalgam" Hôa-gí sī "汞齊", gê-i-su tiāⁿ-tiāⁿ liām-chò "a-má-káng" (tiōng-im tī tē-saⁿ im-chiat); "cement" Hôa-gí sī "黏合劑", tāi-to-sò· liām "sē-mén" (tiōng-im tī āu-pia̍h).

Ah nā it-poaⁿ bîn-chiòng, "resin" lóng kóng-chò "pe̍h-sek--ê" he̍k "chhùi-khí-sek--ê" (kah tōng-sû "pó·" chò-hóe sú-iōng ê ki-hōe khah-chē); "amalgam" kóng "gîn-hún"; "cement" tio̍h chiâⁿ-chió teh kóng, ū-lâng ē ngō·-jīn chò "chio̍h-ko".

"Gîn-hún" í-keng chiâⁿ phó·-phiàn teh kóng, só·-í "amalgam" lán Hō-ló Tâi-gí éng-kai sī hoan-e̍k chò "gîn-hún" khah hó, m̄-koh tī choan-gia̍p jîn-goân lāi-té khó-lêng sī "a-má-káng" khah sî-kiâⁿ.

"Resin" khó-lêng "chhiū-chí" khah iâⁿ-bīn, m̄-koh iáu-bô choa̍t-tùi ê iu-sè, "rē-sín" éng-kai mā chiâⁿ ha̍h Tâi-oân-lâng ê khùi-kháu.

Soah-bóe, "cement" kì-jiân iah chin seⁿ-hūn, ti̍t-chiap ùi Eng-gí lâi hoan-e̍k chò "sē-mén" kám-sī bē-bái? Sin-ê gōa-lâi-gí bô it-tēng ài ùi Hôa-gí lâi hoan, kám-sī?--Albert 08:21, 27 Chhit-goe̍h 2005 (UTC)

Kiàn-gī chit khoán gī-tê ē-sái khui 1 ia̍h Wikipedia:Hoan-e̍k gī-lūn. A-giâu 05:52, 4 Peh-goe̍h 2005 (UTC)

Chi-chhî, iòng-hō· ~~Limkianhui 06:02 4 Peh-goe̍h 2005 (UTC)

Góa mā kám-kak án-ne chiâⁿ-hó.--Albert 03:19, 5 Peh-goe̍h 2005 (UTC)

Chhiáⁿ khoàⁿ Wikipedia:Gōa-lâi-gú. (Wikipedia:Hoan-e̍k ē-sái pó-liû, chò kui-phiⁿ hoan-e̍k ê soat-bêng-ia̍h, khó-pí kóng tùi Eng-bûn Wikipedia hoan-e̍k--kòe-lâi.) A-giâu 17:13, 5 Peh-goe̍h 2005 (UTC)