Pang-chān:Wikipedia

(Tùi 維基百科 choán--lâi)

維基百科是一个自由內容網路百科全書。伊兮目的是卜建立一套自由、免錢、多語兮百科全書。維基百科是網路頂上濟儂使用兮一个參考性質兮網站;伊兮資源平均一日予儂掠五千萬擺。除了傳統兮百科全書詞條以外,又閣有包括著主要兮新聞事件、農民曆等等兮內容。

維基媒體基金會即个無致意欲趁錢兮單位佇後壁支援一般性兮管理佮操作。內容方面完全開放予眾儂合作發展。內容大部份是世界濟濟國兮人事鬥陣撨出來兮結果。參加兮儂自願無定時開家己兮時間寫作、製圖、修改、整理、討論、宣傳即个事工。

維基百科自2001年1月15開始運作。拄開始單純是一个英語兮事工。後來沓沓仔增加其他兮語言。目前有百外種語言版本。

維基百科慣勢用文章兮數量(無論長短好䆀)做成長兮指數。對即个角度來看,會使講成長誠緊。遘2004年2月25為止有50萬篇。遘甲彼年7月有超過31萬篇兮英文文章,另外有53萬篇寫其他語言。9月20彼日衝遘100萬篇。

維基技術佮文化是鬥陣編輯兮重要基礎。維基媒體基金會招程式設計師義務開發MediaWiki即套維基軟體。