Liāu Hàn-sîn

Liāu Hàn-sîn (Hàn-jī: 廖漢臣; 1912 nî 4 goe̍h 10 ji̍t – 1980 nî 10 goe̍h 11 ji̍t) sī chi̍t ūi Tâi-oân chok-ka, tī Ji̍t-pún sî-tāi Tâi-pak-thiaⁿ ê Báng-kah chhut-sì. I-ê pit-miâ hō-chò Bûn-lān (文爛) kap Io̍k-bûn (毓文). Liāu Hàn-sîn tī 1920 nî chìn-ji̍p Lāu-siông Kong-ha̍k-hāu chiū-tho̍k, 1926 nî pit-gia̍p. Sui-jiân i-ê kàu-io̍k thêng-tō͘ kan-nā ki-chhó͘ kàu-io̍k, m̄-koh keng-kòe chū-ha̍k liáu-āu, i-ê Hàn-bûn thêng-tō͘ kap bûn-pit lóng hui-siông ê lián-tńg. 1933 nî, Liāu Hàn-sîn chhut-jīm Sin-ko Sin-pò (新高新報) ê Hàn-bûn kì-chiá kiam Ji̍t-pún Tang-a Sin-pò (東亞新報) Tâi-pak chi-kio̍k ê kì-chiá. Tâng-nî, i hām Koeh Chhiu-seng tàu-tīn chhòng-li̍p Tâi-oân Bûn-gē Hia̍p-hōe (台灣文藝協會), hoat-hêng bûn-ha̍k cha̍p-chì Sian-hoat Pō͘-tūi (先發部隊). Liāu Hàn-sîn āu-lâi poaⁿ-chhian Tâi-lâm, hām Chng Siông-lîm kap Chio̍h Iông-sui chò-hóe so͘-chi̍p le̍k-sú bûn-hòa kap bîn-kan bûn-ha̍k.