Tē-gō͘ tāi hêng-tōng thong-sìn ki-su̍t (Hàn-jī: 第五代行動通訊技術; Eng-gí: 5th generation mobile networks ia̍h 5th generation wireless systems), kán-chheng 5G, sī siāng sin chi̍t tāi ê hêng-tōng thong-sìn ki-su̍t, sī 4G (LTE-A, WiMAX-A) hē-thóng āu ê iân-sin. 5G ê hāu-lêng bo̍k-piau sī ko chu-liāu sok-lu̍t, kiám-chió iân-tî, chiat-séng lêng-goân, kàng-kē sêng-pún, thê-ko hē-thóng iông-liōng kap tōa kui-bô͘ chong-tì liân-chiap. Release-15 tiong ê 5G kui-hoān ê tē-it kai-tōaⁿ sī beh sek-èng chá-kî ê siong-gia̍p pō͘-sú. Release-16 ê tē-jī kai-tōaⁿ tī 2020 nî 4 goe̍h oân-sêng, chò-ûi IMT-2020 ki-su̍t ê hāu-soán thê-kau hō͘ Kok-chè Tiān-sìn Liân-bêng (ITU).