Bāng-ia̍h liû-lám-khì

Bāng-ia̍h liû-lám-khì sī 1-chióng iōng-lâi khoàⁿ kò-jîn kap soàⁿ-téng ê HTML bûn-kiāⁿ ê èng-iōng nńg-thé. It-poaⁿ kán-chheng liû-lám-khì.

Hia̍p-tēng kap piau-chún siu-kái

Liû-lám-khì kap bāng-ia̍h ho̍k-sāi-khì/sù-haū-khì (server) chi-kan lī-iōng HTTP hia̍p-tēng kau-thong.

Le̍k-sú siu-kái

Tim Berners-Lee tī 1990 nî chhòng-chō sè-kài tē-it-ê bāng-ia̍h lîu-lám-khì, kiò-choè WorldWideWeb. Chit-ê lîu-lám-khì kan-na ē-sái chhú-lí bûn-jī, bô hoat-tō͘ chhú-lí tô͘. I tī 1991 nî 3 goe̍h kā chit-ê sán-phín kài-siāu hō͘ CERN ê tông-sū. Chit-ê nńg-thé tī hit tong-sî chú-iàu ê kong-lêng sī hong-piān CERN ê kho-ha̍k-ka cháu-chhoē kap kau-oāⁿ chu-liāu.

Aū--lâi, Bí-kok ê NCSA hoat-tián-chhut tē-it-ê ē-sái hián-sī tô͘-hêng ê liû-lám-khì, kiò Mosaic. Chit-ê liû-lám-khì chin súi koh chin hó-iōng. In-ūi án-ne, liû-lám-khì lú lâi lú liû-hêng. Tī 1993 nî thui-sak chhut Mosaic 1.0 pán. Liáu-aū, Mosaic sió-cho· ê thâu-lâng Marc Andreessen lī-khui NCSA khì khui 1-keng kong-si, kiò Bāng-kéng Thong-sìn Kong-si (Netscape Communications Corporation).

Bāng-kéng tī 1994 nî 10 goe̍h hoat-piaú Netscape Navigator chit-ê liû-lám-khì. Mā ū khai-hòng hō͘ lâng bián-hùi táuⁿ-ló͘. Netscape Navigator siū-tio̍h chin-toā ê hoan-gêng. 1995 nî, Microsoft ūi-tio̍h beh chìn-ji̍p liû-lám-khì nńg-thé ê chhī-tiûⁿ, thui-sak-chhut mā sī bián-chîⁿ ê Internet Explorer (it-poaⁿ kán-siá choè IE). Chit 2-ê liû-lám-khì tī aū-lâi 3 nî chó-iū ê ke̍k-lia̍t kèng-cheng, hō·-lâng chheng-choè "(te-it-pái) liû-lám-khì ê chiàn-cheng".