MKUltra Kè-ōe (Project MKUltra), mā kiò chò CIA sim-su khòng-chè khang-khòe (CIA mind control program), sī chi̍t hāng lī-ēng jîn-lūi siū-giām-chiá ê si̍t-giām, siat-kè kiam si̍t-si ê ki-koan sī Bí-kok ê Tiong-iong Chêng-pò Kio̍k (CIA), tī tong-sî to̍h sǹg sī hui-hoat--ê. In ê jîn-lūi si̍t-giām sī beh chai-iáⁿ kiam hoat-tián thang tī chi̍t-mn̄g sū-bū tang-tiong sán-seng sim-su khòng-chè hāu-kó ê io̍h-bu̍t kap sú-iōng têng-sū. Bí-kok Lio̍k-kun ê Seng-bu̍t-ha̍k Bú-khì Si̍t-giām-só͘ mā ū chham-ka gián-kiù.

MKUltra ēng chē khoán hong-hoat lâi kan-sia̍p lâng ê sim-lí chōng-hóng kap kái-piàn thâu-náu ê kong-lêng, kî-tiong ū ēng tio̍h io̍h-bu̍t (te̍k-pia̍t sī LSD), kî-tha hòa-ha̍k-bu̍t, chhui-bîn (hypnosis), kám-kak toat-chhú (sensory deprivation), ko͘-li̍p, giân-gí chau-that, kiam kî-tha hêng-sek ê sim-lí gio̍k-thāi.