Verónica Michelle Bachelet Jeria /βeˈɾonika miˈʃɛl baʃˈle ˈçeɾja/ (1951 nî 9 goe̍h 29 seⁿ) sī Chile Siā-hōe-tóng ê chèng-tī jîn-bu̍t. I pún-té sī gōa-kho kiam sió-jî-kho i-seng. I iâⁿ 2006 nî ê chóng-thóng tāi-soán, 3 goe̍h 11 chiū-jīm, chiâⁿ-chò hit-kok thâu-1-ê cha-bó· chóng-thóng. I kiâⁿ un-hô ê tiong-kan-phian-chó lō·-soàⁿ, 1 hong-bīn beh chiap-sòa Ricardo Lagos ê chū-iû chhī-tiûⁿ chèng-chhek, lēng-gōa 1 hong-bīn oân-ná kóng beh ka-kiông siā-hōe hok-lī thang kiám-chió hó-gia̍h kap sàn-chhiah chi-kan ê chha-īⁿ. Bachelet ê sèng-pia̍t kap i tan-sin bó-chhin ê sin-hūn siū-tio̍h kok-chè kap Chile mûi-thé te̍k-pia̍t chù-ì.

Bachelet, 2006

Bachelet ê lāu-pē sī Chile Khong-kun ê chiong-kun, in-ūi hoán-tùi Augusto Pinochet chiong-kun tī 1973 nî kun-piàn, āu--lâi sí tī kaⁿ-ga̍k. I kap lāu-bó hō· sin chèng-koân koaiⁿ kúi-ā-lé-pài. 1975 nî lī-khui Chile, tī Tang-tek oân-sêng i-ha̍k ha̍k-ūi. 1979 nî tńg-khì Chile. I tāi-ha̍k sî-tāi tō chham-ka Siā-hōe-chú-gī Chheng-liân-hōe, tī 1980 nî-tāi ē-kî koh-chài kiâⁿ-ji̍p chèng-tī. 1995 nî tam-jīm Chile Siā-hōe-tóng ê Tiong-iong Úi-oân; 1998 kàu 2000 nî sī Chèng-tī Úi-oân-hōe (Political Commission) ê chek-ke̍k hūn-chú. 1996 nî tâu-ji̍p Las Condes ê chhī-tiúⁿ soán-kí, tùi-chhiú sī āu--lâi ê chóng-thóng tùi-chhiú Joaquín Lavín. Lavín iâⁿ 78% ê phiò, i kan-taⁿ the̍h-tio̍h 2.35%, pâi tē-4-ūi. 1999 nî i ūi Ricardo Lagos tī chóng-thóng chho·-soán chō·-soán. Lagos chiū-jīm liáu-āu, chi-phài i chò oē-seng pō·-tiúⁿ (2000 nî) kap kok-hông pō·-tiúⁿ (2002 nî). I sī tē-1-ê tī Latin Bí-chiu kok-ka hoāⁿ hit-ūi ê cha-bó·-lâng.

Siā-hōe-tóng chhōa-thâu ê Concertación liân-bêng chū 1990 nî bîn-chú-hòa liáu-āu hoāⁿ-koân kàu-taⁿ. Ricardo Lagos chip-chèng ê kî-kan, Chile ê keng-chè sêng-tióng chhiau-kòe 5%. [1]

Gōa-pō· liân-kiat siu-kái

 

Wikimedia Commons téng ê siong-koan tóng-àn: Michelle Bachelet