Kang-tiûⁿ
Kang-tiûⁿ (工場), ia̍h kang-chhiúⁿ (工廠), sī teh seng-sán hòe-bu̍t ê tōa-hêng kang-gia̍p kiàn-tio̍k-bu̍t. Tōa pō͘-hūn ê kang-tiûⁿ lóng ū siat tōa-hêng ke-khì ia̍h iû siat-pī kò͘-sêng ê seng-sán-sòaⁿ.
Siāng chá-kî ê kang-tiûⁿ (pí-lūn 18 sè-kí khí tī Eng-kok si̍t-bîn-tē ê kang-tiûⁿ) pēng bô tōa-hêng ê chū-tōng-hòa ke-khì. Hit-tang-chūn ê kang-tiûⁿ sûn-chhùi sī hō͘ chi̍t tīn chiông-sū chhiú-kang-gia̍p (chhin-chhiūⁿ pháng-chit-gia̍p) ê kang-lâng chū-chi̍p khí-lâi, chò-hóe chìn-hêng seng-sán khang-khòe. Chit chióng chò-hoat khah hó koán-lí, ah goân-liāu mā khah ē-tàng ū-hāu hun-phòe.
Ti̍t-kàu tōng-le̍k chit-pò͘-ki kap cheng-khì-ki téng ki-hāi hoat-bêng liáu-āu, khai-sí chhut-hiān í ke-khì seng-sán ê kang-tiûⁿ. Ki-hāi kap khó-thè-ōaⁿ ê lêng-kiāⁿ hō͘ seng-sán koh-khah ū hāu-lu̍t, mā kiám-chió hùi-bu̍t. Kang-tiûⁿ ê tōa-liōng chhut-hiān sī kang-gia̍p kek-bēng ê khai-toan.