Nebraska
Nebraska sī Bí-kok ê chi̍t-ê chiu. Siú-hú sī Lincoln. Siāng toā ê siâⁿ-chhī sī Omaha.
| Nebraska Chiu State of Nebraska | |||||
|---|---|---|---|---|---|
| |||||
| Chhiok-hō: Cornhusker State | |||||
| Piau-gí: Equality before the law | |||||
 | |||||
| Koan-hong gí-giân | Eng-gí | ||||
| Chū-bîn chheng-ho͘ | Nebraskan | ||||
| Siú-hú | Lincoln | ||||
| Siāng-tōa siâⁿ-chhī | Omaha | ||||
| Siāng-tōa to͘-hōe | Omaha-Council Bluffs | ||||
| Bīn-chek | Pâi-miâ tē-16 | ||||
| • Ha̍p-kè |
77,354 sq mi (200,520 km2) | ||||
| • Tang-sai khoah | 210 lí (340 km) | ||||
| • Lâm-pak khoah | 430 lí (690 km) | ||||
| • % chúi-bīn | 0.7 | ||||
| • Hūi-tō͘ | 40° N to 43° N | ||||
| • Keng-tō͘ | 95° 19' W to 104° 03' W | ||||
| Jîn-kháu | Pâi-miâ tē-37 | ||||
| • Ha̍p-kè | 1,896,190 (2015 est)[1] | ||||
| • Bi̍t-tō͘ |
24.0/sq mi (9.25/km2) Pâi-miâ tē-43 | ||||
| • Hō͘-kháu siu-ji̍p tiong-ta̍t | $44,623 (tē-20) | ||||
| Koân-tō͘ | |||||
| • Ko-tiám |
Panorama Point[2][3] 5,424 ft (1654 m) | ||||
| • Pêng-kin | 2,600 ft (790 m) | ||||
| • Kē-tiám |
Missouri Hô[2][3] 840 ft (256 m) | ||||
| Siat chiu chìn-chêng | Nebraska Léng-thó͘ | ||||
| Sin chiu seng-li̍p | March 1, 1867 (tē-37) | ||||
| Chiu-tiúⁿ | Pete Ricketts (R) | ||||
| Hù-chiu-tiúⁿ | Mike Foley (R) | ||||
| Li̍p-hoat | Nebraska Li̍p-hoat-hōe | ||||
| • Siōng-gī-īⁿ | Bô (it-īⁿ-chè) | ||||
| • Hā-gī-īⁿ | Bô (it-īⁿ-chè) | ||||
| Chham-gī-goân |
Deb Fischer (R) Ben Sasse (R) | ||||
| Chiòng-gī-īⁿ tāi-piáu |
Jeff Fortenberry (R) Brad Ashford (D) Adrian Smith (R) (lia̍t-toaⁿ) | ||||
| Sî-khu | |||||
| • tōa-hūn | Central: UTC −6/−5 | ||||
| • panhandle | Mountain: UTC −7/−6 | ||||
| ISO 3166 | US-NE | ||||
| Kán-siá | NE, | ||||
| Bāng-chām |
www | ||||
Tē-hō-miâ siu-kái
Nebraska sī kó͘ Otoe ōe ê Ñí Brásge (ho͘-im: [ɲĩbɾasꜜkɛ]) he̍k-chiá Omaha ōe ê Ní Btháska (ho͘-im: [nĩbɫᶞasꜜka]) choán--lâi-ê, ì-sù sī "pêⁿ-pêⁿ ê chúi", chí chāi-tē ê Platte Hô.[4]
Tē-lí siu-kái
Pún chiu sī Bí-kok Chêng-hong Sòaⁿ (Frontier Strip) ê chi̍t pō͘-hūn, ūi tī South Dakota ê lâm-pêng, Iowa ê sai-pêng kap Missouri ê sai-pak, nn̄g chiu sio keh Missouri Hô; lēng-gōa mā sī tī Kansas pak-pêng, Colorado ê tang-pak kap Wyoming tang-pêng.
Chiu lāi ū hūn 93-ê kūn. Jîn-chhiá khòa nn̄g-ê sî-khu: tang pòaⁿ-pêng sio̍k Tiong-iong Sî-kan (Central Time); se pêng sī Soaⁿ-khu Sî-kan (Mountain Time).
Ū saⁿ tiâu tōa hô tùi sai-pêng hiòng tang keng-kòe Nebraska: Platte Hô tùi tiong-ng, Niobrara Hô tùi pak-pō͘, Republican Hô tùi lâm-pō͘. Chiàu tē-hêng lâi kóng, Nebraska ē-sài hun nn̄g-ê tōa khu, óa tang-pêng sī sǹg Dissected Till Plains khu, Omaha kap Lincoln nn̄g-ê tōa siâⁿ lóng tī chit pêng; nā sai-pêng sī Great Plains khu.
Nebraska è khì-hāu thang hun chò 2-ê tōa-khu, tang-pòaⁿ-pêng sī sip-jūn tāi-lio̍k khì-hāu, sai-pòaⁿ-pêng sǹg sī pòaⁿ-ta-sò khì-hāu (semi-arid climate). Kui-chiu lóng tī un-tō͘ kiam kàng-chúi ê hong-bīn ū pêng-hián kùi-chiat piàn-hòa, joa̍h-thiⁿ chin joa̍h, kôaⁿ-thiⁿ chin kôaⁿ.
Le̍k-sú siu-kái
Chá-liân tī Nebraska khiā-khí ê goân-chū-bîn pō͘-lo̍k ū Omaha, Missouria, Ponca, Pawnee, Otoe, kap kî-tha chi̍t-kóa Lakota (Sioux) lâng, in chi̍t pō͘-hūn sī tùi tang-pêng î-bîn kòe--lâi.
Au-chiu-lâng tī chit ūi oa̍h-tāng ê sî-chūn, Hoat-kok kap Se-pan-gâ sī chú-iāu tī chia kēng-cheng ê sè-le̍k. 1690 nî-tāi, Se-pan-gâ kiàn-li̍p liáu kap Apache-lâng (ū ùi Nebraska se-pō͘ oa̍h-tāng) ê bō͘-e̍k lâi-óng. 1703 nî, Hoat-kok mā kah Nebraska Missouri Hô tē-khu ê goân-chūn-bûn hoat-tián seng-lí koan-hē. Kàu 1719 nî, koh kah chia ê lâng chhiam liáu chi̍t kóa tiâu-iok.
Se-pan-gâ kap Hoat-kok au-lâi hoat-seng chiàn-cheng, 1720 nî Se-pan-gâ Pedro de Villasur chiong-kun hiòng Nebraska chhut-peng, soah hō͘ kap Hoat-kok kiat-bêng ê Pawnee kap Otoe cho̍k ê lâng phah-pāi.
1762 nî, Hoat-kok tī Chhit-nî Chiàn-cheng tiong, kā Louisiana Léng-thó͘ kòa-niū hō͘ Se-pan-gâ, che chō-sêng Eng-kok kap Se-pan-gâ tī Mississippi Hô tē-khu ê kēng-cheng khai-sí. Eng-kok tī 1773 nî chiū kap Nebraska goân-chū-bûn ū seng-lí lâi-óng, Se-pan-gâ mā phài lâng tī 1794 kap 1795 nî hiòng Missouri Hô thàm-hiám, jî-chhiá tī James Mackay ê niá-chhōa hā ùi Platte Hô chhut-kháu hū-kīn kiàn-li̍p Nebraska siāng chá ê Au-chiu-lâng ke-chhī, in-ê lâng āu-bóe koh tī kin-á-ji̍t Homer siâⁿ hū-kīn khí-chō bo̍k-e̍k-chām.
1819 nî, Bí-kok siat Fort Atkinson chò Missouri Hô͘ sai-pêng thâu chi̍t-ê lio̍k-kun tūn-iâⁿ.
Bí-kok tī 1854 nî 5 goe̍h 30, kun-kù Kansas-Nebraska Hoat-àn, Kansas kap Nebraska Léng-thó͘ kiàn-li̍p. Kî-tiong Nebraska Léng-thó͘ pau-koat liáu kin-á-ji̍t ê Colorado, North Dakota, South Dakota, Wyoming kap Montana. Léng-thó͘ siú-hú sī Omaha.
Nebraska koh tī 1867 nî 3 goe̍h kái siat chò Bí-kok tē-37-ê chiu, hit-tong-sî siú-to͘ tùi Omaha sóa kòe Lancaster (āu-lâi kái miâ Lincoln). 1873 nî 8 goe̍h 5 ji̍t, Pawnee kap Sioux nn̄g cho̍k tī Massacre Canyon sio-thâi.
19 sè-kí bóe-kî, chin chē Hui-chiu-hē Bí-kok-lâng î-bîn tùi lâm-pêng hiòng pak î-bîn, Nebraska sī in chiân-óng kî-tiong chi̍t ūi. Chia-ê î-bîn khì hia liáu-āu, tōa-hūn chò kang seng-oa̍h.
1898 nî 6 goe̍h kàu 11 goe̍h kî-kan, Gōa-Mississippi Phok-lám-hōe (Trans-Mississippi Exposition) tī Omaha kí-pān.
O͘-lâng tī Omaha siū tio̍h chha-pia̍t tùi-thāi, chit ūi mā piàn chò sī bîn-khoân ūn-tōng ê oa̍h-tāng tē-tiám chi it. Kàu 1960 nî-tāi, Bí-kok goân-chū-bîn ê ūn-tōng mā tī chiu lāi liû-hêng khì--lâi.
Jîn-kháu siu-kái
Kun-kù Bí-kok Phó͘-cha Kio̍k (United States Census Bureau) ê ko͘-sǹg, Nebraska tī 2014 nî-tiong jîn-kháu ū 1,881,503 lâng.
Kun-kù 2010 nî ê phó͘-cha, 86.1% ê Nebraska chiu-bîn sī pe̍h-lâng, kî-tiong lāi-bīn hui-Se-pan-gâ-hē chiàn 82.1%; nā o͘-lâng chiàm 4.5%; Bí-chiu goân-chū-bîn chiàm 1.0%; A-chiu-lâng chiàm 1.8%; Hawaii kap kî-tha Thài-pêng-iûⁿ goân-chū-bîn ū 0.1%.[5]
Keng-chè siu-kái
Kun-kù Keng-chè Hun-sek Kio̍k (Bureau of Economic Analysis) kè-sǹg Nebraska tī 2014 nî ê chiu-lāi chóng seng-sáng (GDP) ū 992 ek bí-kim.[6] In chú-iàu lông-sán ū gû-bah, ti-bah, hoan-be̍h, kap tōa-tāu téng-téng. Kî-tha pí-lūn thih-lō͘ kap khah-chhia ūn-su-gia̍p, chè-chō-gia̍p, thong-sìn mā sī hoat-ta̍t.
Chiàu 2015 nî 4 goe̍h sò͘-jī, Nebraska sit-gia̍p-lu̍t sī 2.5%, sī kok-lāi siāng kē[7]. 2015 nî pún chiu siāng-chē lâng chò ê khang-khòe sī kiān-khong chiàu-kò͘ kap siā-hōe hû-chō͘ (health care and social assistance) sán-gia̍p.[8]
Kau-thong siu-kái
Liân-ha̍p Thài-pêng-iûⁿ Thih-lō͘ (Union Pacific Railroad) kong-si chóng-pō͘ siat ùi Omaha. Kî-tha ùi pún chiu teh ūn-chok ê chú-iàu thih-lō͘ koh ū Amtrak, BNSF Railway. Ka-na-tah Thài-pêng-iûⁿ Thih-lō͘ (Canadian Pacific Railway) kap Iowa Chiu-chè Thih-lō͘ (Iowa Interstate Railroad).
Thong-kòe Nebraska ê chiu-chè kong-lō͘ ū I-76, I-89, I-129, I-180, I-380, kap I-680.
Chham-khó siu-kái
- ↑ "Table 1. Annual Estimates of the Resident Population for the United States, Regions, States, and Puerto Rico: April 1, 2010 to July 1, 2015" (CSV). U.S. Census Bureau. December 26, 2015. December 26, 2015 khòaⁿ--ê.
- ↑ 2.0 2.1 "Elevations and Distances in the United States". United States Geological Survey. 2001. October 24, 2011 khòaⁿ--ê.
- ↑ 3.0 3.1 Elevation adjusted to North American Vertical Datum of 1988.
- ↑ Koontz, John. "Etymology". Siouan Languages. November 28, 2006 khòaⁿ--ê.
- ↑ "Nebraska QuickFacts from the US Census Bureau". Quickfacts.census.gov. October 18, 2012 khòaⁿ--ê.
- ↑ Total Gross Domestic Product by State for Kansas, FRED.
- ↑ Local Area Unemployment Statistics, U.S. Bureau of Labor Statistics.
- ↑ "Major industries with highest employment, by state, 1990-2015". Bureau of Labor Statistics. U.S. Bureau of Labor Statistics. 2016-08-05. 2017-01-23 khòaⁿ--ê.