Sap-bûn
Sap-bûn sī chi̍t lūi chheng-kiat-che, iōng chí-hông-sng chham kah-sò͘ (K) ia̍h la̍p-sò͘ (Na) ê iông-lī-chú hóan-èng chè-chō, chāi hòa-ha̍k-siōng sī iâm-lūi.
Sap-bûn chheng-kiat ê gôan-lí sī lī-iōng iông-lī-chú ê chhin-chúi-sèng kap chí-hông-sng ê ià-chúi-sèng, chi̍t hong-bīn chham a-cha-mi̍h sio-khan; chi̍t hong-bīn koh kah chúi-hun-chú sio-khan, liáu-āu kā a-cha khan lî-khui mi̍h-kiāⁿ ê piáu-bīn.
Gí-gôan siu-kái
Hō-ló-ōe "sap-bûn" chit jī mā ū lâng kóng "sat-bûn" ia̍h "soat-bûn". (Hàn-jī: 雪文), in ê goân-thâu sī Au-chiu gí-giân, pí-lūn Phû-tô-gâ-gí kóng "sabão" (IPA: /sɐ.ˈβɐ̃w̃/).
Tī chi̍t kóa só͘-chāi, sap-bûn chit khóan mi̍h-kiāⁿ hō chò "tê-kho͘" (he̍k-chiá choan-bûn chí chi̍t lūi sap-bûn), che sī in-ūi kó͘-chá-sî lī-iōng tê-kho͘, iā-chiū-sī chè-chō tê-iû chhun--lo̍h ê iû-tái lâi chheng sin-khu, sé mi̍h-kiāⁿ.
Lēng-gōa mā ū chi̍t kóa só͘-chāi kóng "hoan-kiⁿ".