Thó-lūn:Lôe
(Tùi 犁 choán--lâi)
犁
siu-kái
犁、牛犁是一種作穡用的農具，佇人有咧種作、會曉借部份六畜的力來鬥做工課開始，應該著有這種家私，在無仝的所在，無仝的用途會有無仝的形體的犁：挓園犁田用的、收成專用用的。
一張犁是有犁車、犁頭、犁壁、犁車擔、犁thok佮兩條比牛身長（牛肩 -- 牛後座）較長小可的大索，一條牽胸索仔來組成的。
犁頭、犁壁是用鉎仔翻砂鑄造的，犁頭是消磨品。
在用犁挓園盤反，弄鬆園塗的時，免不了黏塗會銜牢佇犁頭佮犁壁表面，予犁浮佇塗面無法度深挓。彼个時陣犁thok就會予咱提來黜掉黏佇犁頭、犁壁的塗，予犁閣會當繼續犁出欲挃的溝、弄鬆猶未挓完的園。
佇有種作的田園兩欄（兩稜、兩逝）中間挓園的時，為著避免予牛oân路瞪犁oân路向落食兩爿長成的農作物，牛喙著會掛牛喙籠，牛喙籠早期是用竹篾仔掠的，這馬nái-lóng(nylon)索仔凊彩買會著，家己鐵箍拗拗下，索仔掠掠下著有矣。
一陣人去到田園攏是替扞犁尾的人咧行，扞犁尾的人差不多著是這陣人的chhoā頭，扞犁尾的技術是愛學習，毋是凊彩人攏會曉的。