Cheng-kong ê Hans

Cheng-kong ê Hans (Tek-gí: der Kluge Hans, 1895 nî - 1916 nî) sī chi̍t chiah Orlov Trotter phín-chéng ê bé. I ē-hiáu piáu-ián sǹg-su̍t kap kî-tha chi̍t koá châi-gē. I ê chú-lâng kap hùn-liān-chiá sī Wilhelm von Osten.

Sim-lí-ha̍k-ka Oskar Pfungst tùi Cheng-kong Hans ê châi-lêng thê-chhut ké-soeh. I jīn-ûi chit chiah bé m̄-sī chin-chiàⁿ liáu-kái chia-ê châi-gē, i-ê piáu-hiān sī tùi lâng bô-chū-kak tián-hiān chhut--lâi ê sin-thé gí-giân só͘ chò ê hoán-èng.

Chit-ê hiān-siōng hong chheng chò "Cheng-kong Hans hāu-kó͘"; sī koan-chhat-chiá kî-bōng hāu-kó͘ (observer-expectancy effect) ê chi̍t lē.