Chu Tiám-jîn

Chu Tiám-jîn (朱點人; 1903 nî  – 1951 nî 1 goe̍h 20 ji̍t), tī Tâi-pak Báng-kah chhut-sì, pún-miâ Chu Chio̍h-thâu (朱石頭), āu-lâi kái-miâ Chu Se̍k-hong (朱石峰), pit-miâ Tiám-jîn (點人), Biâu-bûn (描文) kap Bûn-biâu (文苗), sī Tâi-oân Ji̍t-pún sî-tāi chiâⁿ chhut-miâ ê chok-ka.

Chu Tiám-jîn tī 1918 nî ùi Láu-siông Kong-ha̍k-hāu pit-gia̍p, āu-lâi chìn-ji̍p Tâi-pak I-ha̍k Choan-bûn Ha̍k-hāu chò kò͘-oân. 1933 nî hām Ông Si-lông, Koeh Chhiu-seng téng lâng cho͘-chit Tâi-oân Bûn-gē Hia̍p-hōe, hoat-hêng khan-bu̍t Sian-hoat Pō͘-tūi, āu-lâi kái-miâ Tē-it Sòaⁿ koh hoat-hêng, tùi bîn-kan bûn-ha̍k chéng-lí chiâⁿ ū kiàn-sū.

Tē-jī-chhù Sè-kài Tāi-chiàn liáu-āu, Chu Tiám-jîn in-ūi put-boán Kok-bîn-tóng ê thóng-tī kap siū-tio̍h Jī-jī-pat Sū-kiāⁿ ê chhì-kek, su-sióng chiām-chiām chó-kheng, chòe-āu soán-te̍k ka-ji̍p Tiong-kok Kiōng-sán Tóng, 1949 nî pī lia̍h, 1951 nî 1 goe̍h 20 pī chhèng-sat.