Lîm Chong-goân
Lîm Chong-goân (林宗源, 1935 nî chhut-sì), Tâi-oân Tâi-lâm-chhī lâng, tùi Tâi-lâm Jī Tiong pit-gia̍p. 1970 nî-tāi khai-sí ēng Tâi-gí siá si, sī chiàn-āu thê-chhiòng Tâi-gí-si ê sian-hong chi it. I iā-bat sī Hiān-tāi Si-siā siā-tiúⁿ, Tâi-gí-bûn Thui-tián Hia̍p-hoē hoē-tiúⁿ. 1964 nî ka-ji̍p Le̍h-si-siā, 1987 nî sī Tâi-oân Pit-hoē lí-sū, 1991 nî kap N̂g Kèng-liân téng lâng chhòng-li̍p 'Han-chî Si-siā', hoat-hêng Han-chî Si-khan, kiông-tiāu "Tâi-gí bûn-ha̍k chiū-sī Tâi-oân bûn-ha̍k", 1994 nî chham-ú chú-pān tē-it kài Lâm-khun-sin Tâi-gí Bûn-ha̍k-iâⁿ. 1976 nî tit-tio̍h Ngô͘ Cho̍k-liû Sin-si Chióng, 1994 nî the̍h-tio̍h Êng-hiō Tâi-oân Si Chióng, 2004 nî koh tit-tio̍h Iâm-hūn Tē-tài Bûn-gē Iâⁿ Tâi-oân Bûn-ha̍k Kòng-hiàn Chióng.
Lîm Chong-goân tì-tiōng si ê ti-sèng, si-chok ê toê-châi ū chin-choē khoán, tùi Tâi-oân siā-hoē, hiong-thó͘, jîn-seng tiat-ha̍k kàu chèng-tī ūn-tōng lóng ū. Ū si-chi̍p Le̍k ê Kiàn-tio̍k, Si̍t-phín-tiàm, Pó͘ Phoà-bāng, Le̍k ê Bú-tō, Lô-chúi-khe, Lîm Chong-goân Tâi-gí Si-soán, Bô Kìm-khī ê Kek-chêng, Lîm Chong-goân Tâi-gí Si Cheng-soán-chi̍p, téng-téng.
Chham-khó Chu-liāu
siu-kái- Lī Heng-chhiong: Tâi-oân Si-jîn Gián-kiù Lūn-bûn-chi̍p, Tâi-lâm Chhī-li̍p Bûn-hoà Tiong-sim, 1995.