Oân-seⁿ

Oân-seⁿ (灣生; わんせい ^Wansei) sī Ji̍t-pún sî-tāi tī Tâi-oân chhut-seⁿ ê Ji̍t-pún-lâng, pau-hâm Tâi-Ji̍t thong-hun ê kiáⁿ-jî. Ji̍t-pún tī Tē-jī-chhù Sè-kài Tāi-chiàn chiàn-pāi liáu-āu, ūi-tio̍h phòe-ha̍p Kok-bîn Chèng-hú ê bēng-lēng, ùi 1945 nî 12 goe̍h khai-sí kàu 1946 nî 4 goe̍h, pau-hâm Oân-seⁿ chāi-lāi ê toā-pō͘-hūn chāi-Tâi Ji̍t-pún-lâng lóng pī khián-hoán Ji̍t-pún, kan-na chhun chi̍t-koá kū-iú choan-gia̍p ki-lêng ê lâng lâu lo̍h-lâi pang-chō͘ chiàn-āu tiông-kiàn.