Phek-le̍k Pò͘-tē-hì

Phek-le̍k Pò͘-tē-hì (霹靂布袋戲) sī Tâi-oân ùi 1980 nî-tāi khai-sí sin hoat-tián chhut-lâi ê chi̍t-chióng tiān-sī pò͘-tē-hì, lē-sio̍k Phek-le̍k Kok-chè To-mûi-thé; iû táng-sū-tiúⁿ N̂g Kiông-hoâ kap hù-táng-sū-tiúⁿ N̂g Bûn-te̍k só͘ léng-tō chè-chok. Lōe-iông chhái-chhú tn̂g-phiⁿ tan-goân-kio̍k ê hong-sek lâi ián-chhut, ta̍k-chi̍t chhut kio̍k-chi̍p miâ-chheng ê thâu-chêng lóng siá "Phek-le̍k" 2-jī.

Bo̍k-chiân, Phek-le̍k Pò͘-tē-hì sī Phek-le̍k Kok-chè To-mûi-thé chú-táⁿ ê chok-phín, mā sī kong-si chú-iàu ê hêng-siōng lâi-goân. Hì-chhut tiong ê jîn-bu̍t Sò͘-hôan-chin, It-ia̍p-su kap Ia̍p Sió-the sī Phek-le̍k Tâi-oân Tâi ê tô͘-siōng siong-phiau. In-ūi Phek-le̍k Pò͘-tē-hì khip-ín liáu kóng-tāi ê koan-chiòng, hō͘ hì-chhut tiong ê chú-iàu jîn-bu̍t chiâⁿ-chò bē-chió koan-chiòng ê ngó͘-siōng. I-ê chiu-piⁿ siong-phín pau-hâm ang-á, kio̍k-chi̍p goân-siaⁿ-tài, tiān-náu, soàⁿ-téng iû-hì kap kî-thaⁿ jîn-bu̍t siong-phín.