Siā-kau put-an chiòng-gāi
Siā-kau put-an chiòng-gāi (社交不安障礙; Eng-bûn: Social Anxiety Disorder, SAD) sī chi̍t chióng tùi jīm-hô siā-kau kap kong-khai tiûⁿ-bīn lóng ē kám-siū tio̍h kiông-lia̍t put-an kap hoân-ló ê cheng-sîn-pēⁿ. Siā-kau put-an chiòng-gāi mā ē-ēng hō-chò siā-kau khióng-khū-chèng (社交恐懼症) iáu-koh-ū siā-kau chiau-lū-chèng (社交焦慮症; social anxiety) téng-téng. Hoān-chiá it-poaⁿ ē tùi tī chheⁿ-hūn-lâng ê bīn-thâu-chêng ia̍h-sī khó-lêng ē khì hō͘ pa̍t-lâng chú-sè koan-chhat ê siā-kau kap piáu-ián tiûⁿ-bīn, tián-hiān chhut chi̍t chióng bêng-hián koh kú-tn̂g ê kiaⁿ-hiâⁿ, khióng-kiaⁿ ka-kī ê hêng-ûi ē ín-khí tio̍h bú-jio̍k kap phái-khòaⁿ-bīn. Ū chi̍t-kóa hoān-chiá sīm-chì tùi chham-ka chū-hōe, khà tiān-ōe, kàu siong-tiàm bé mi̍h-kiāⁿ iáu-koh-ū mn̄g tāi-chì mā ē kám-kak tio̍h khùn-lân.