Tâi-gí Pe̍h-ōe-jī Bûn-ha̍k Soán-chi̍p

Tâi-gí Pe̍h-oē-jī Bûn-ha̍k Soán-chi̍p (台語白話字文學選集) sī Kok-li̍p Tâi-oân Bûn-ha̍k-koán úi-thok Sêng-kong Tāi-ha̍k Tâi-bûn-hē (成功大學台文系)--ê Chiúⁿ Ûi-bûn (蔣為文) Kàu-siū kap chi̍t kóa gián-kiù Tâi-gú-bûn--ê sian-pòe tī 2011 nî 11 ge̍h chhut-pán--ê 1 thò chheh, lōe-iông sī tùi óng-koè chē-chē--ê POJ bûn-hiàn lāi-bīn kéng chhut khah ū bûn-ha̍k tāi-piáu sèng--ê chok-phín soán-lo̍k ji̍p--khì, 1 thò 5 pún, hun-pia̍t sī:

  1. Bûn-hòa lūn-su̍t kap khé-bông (文化論敘kap啟蒙)
  2. Tâi e̍k bûn-ha̍k(台譯文學)
  3. Si.Koa(詩.歌)
  4. Siáu-soat. Ke̍k-pún(小說.劇本)
  5. sàn-bûn(散文)

Chit thò chheh múi chi̍t pún thâu-chêng lóng sī ēng POJ goân-bûn,āu-piah ēng Hàn-lô (漢羅) su-siá--ê hong-sek hō͘ ta̍k-ê thang tùi-chiàu, chi̍t hong-bīn mā sī hong-piān hiān-tāi lâng lâi tha̍k, m̄-koh thâu-chêng goân-bûn ê pō͘-hūn in-ūi ū koh têng phah-jī, só͘-í chi̍t jī pòaⁿ jī ū chhò-gō͘, chit-thò chheh--ê hoat-hêng chok-chiá chú-iàu sī beh chèng-bêng Tâi-gú tī 19 sè-kì khai-sí tio̍h ū ēng pe̍h-ōe su-siá ê hong-sek lâi chhut-pán bûn-ha̍k chok-phín, piáu-sī kóng Tâi-oân pe̍h-ōe su-siá ê le̍k-sú sī pí Tiong-kok koh-khah chá.

Put-jî-kò sui-bóng án-ni ,tī chit thò chheh lāi-tóe mā ē-tàng hoat-hiān ū chi̍t kóa sī Tiong-kok chhut-pán ê chok-phín, pí-lún kóng tī thâu 1 pún Bûn-hòa lūn-su̍t kap khé-bông chit pún chheh lāi-bīn ū chi̍t phiⁿ Pit-soàn Ê Chho͘-ha̍k (筆算 ê 初學) tio̍h sī tī Ē-mn̂g Kó͘-lōng-sū (廈門鼓浪嶼) hoat-hêng--ê, tē 2 pún Tâi e̍k bûn-ha̍k mā ū gō͘ phiⁿ bûn-chiuⁿ sī Ē-mn̂g ê Bân-lâm Sèng-kàu Su-kio̍k (閩南聖教書局) chhut-pán--ê, lēng-gōa mā siu-lo̍k chi̍t phiⁿ tī Siōng-hái Sèng-chheh Kong-hoē (上海聖冊公會) hoat-hêng ê Chhòng-sè-kì (創世紀), ia̍h koh ū tē 3 pún Si.Koa(詩.歌) só͘ siu-lo̍k--ê chok-phín tōa pō͘-hūn lóng sī Ē-mn̂g chhut-pán ê Ióng-sim-sîn-si (養心神詩) só͘ kéng--chhut-lâi ê, chiông-tiong ū chi̍t phiⁿ Sim-sek-koa (心適歌,1898)--ê chok-chiá tio̍h sī Ē-mn̂g Lú-o̍h (廈門女學)--ê ha̍k-seng, che sī khah sio-ta̍h-thut--ê só͘-chāi.