Tâi-oân bîn-iâu sī tī Tâi-oân liû-thoân ê bîn-kan koa-iâu, chi̍p-kiat chē-chē thoân-thóng bûn-hòa kap hiong-thó͘ khì-sit ê koa-iâu, sī iû Tâi-oân siā-hōe bûn-hòa, seng-oa̍h lōe-hâm, kap bîn-cho̍k si̍p-sio̍k só͘ ha̍p-sêng ê koa-iâu. Tōa-pòaⁿ ê bîn-iâu lóng sī keng-iû bîn-kan chi̍p-thé chhòng-chok oân-sêng--ê, koh keng-kòe kháu-gí tāi-tāi sio-thoân, in-chhú lōe-iông hām Tâi-oân siā-hōe thoân-thóng ū siong-tong tōa ê koan-liân. In-ūi to-sò͘ koa-iâu lóng sī keng-iû kháu-thoân, só͘-í chē-chē bîn-iâu lóng bô-hoat-tō͘ chhōe tio̍h chok-chiá.