Tō-keng (道經) sī Tō-kàu ê keng-tián, kó͘-chá sî-tāi ū Hûn-ki̍p (雲笈), Thian-chiong (天章), Pó-bûn (寶文), Sîn-su (神書), Gio̍k-hūi (玉緯), Kim-hâm (金函), Sian-keng (仙經), Tan-su (丹書), Tō-su (道書) téng chheng-ho͘.

Chiàu Tō-kàu ê thoân-soat, Tō-kàu sī chū-jiân ê thian-su, khí-goân chū Goân-sí Thian-chun, Thài-siōng Tō-kun kap Thài-siōng Ló-kun chit 3 ūi chun-sîn, ha̍p-chheng Sam-chheng. Sam-kun kok-chū kóng Tōng-chin (洞真), Tōng-hiân (洞玄), Tōng-sîn (洞神) 12 phō keng, ha̍p chò Sam-si̍p-lio̍k-pō͘ Chun-keng.