Thó-lūn:Koa-kio̍k

歌劇

歌劇是用音樂來連貫抑是以音樂為主的舞臺作品，歌劇佇差不多西元1600年的時陣佇咧義大利的佛羅倫斯(Firenze)，並且佇17世紀尾佇義大利地區流行，到18世紀中就傳播到大部份的西歐地區。

歷史

---

起源

歌劇的原頭會用追朔到古早時代希臘的悲劇；若是毋管希臘悲劇佮差不多西元900年代佇咧歐洲演出的禮儀劇(Liturgical Drama)，著無法度來探討歌劇的歷史，佇咧彼當陣的這款禮儀劇是以獨唱、合唱佮簡單的器樂伴奏構成的，遮的戲劇對1200年到1300年發展變做奇蹟劇(Miracle play) 佇咧歐洲四界流傳；到無外久，佇咧歌劇的誕生地，義大利，嘛用奇蹟劇的名來演出，變做歌劇佮清唱劇(Oratorio)的先祖，遮的戲劇攏是佇咧教會來產生，一直到差不多1400年才開始到教堂以外的所在做演出。

誕生

音樂佮場景結合演出的節目，佇咧文藝復興(Renaissance)時期的義大利，開始出現各種的可能性，佇咧曼多瓦(Mantova)的岡薩加(Gonzaga)府第佮維成薩(Vicenza)遮的所在，攏有演過田園劇(Pastorale)佮幕間劇(Intermedio)的記載;這其中上重要的集會所在就是佛羅倫薩(Firenze)的梅迪奇(Medici)府第，到今仔日雖然嘛是有足濟無仝的論調，毋過一般攏是共以巴爾第(Giovanni de' Bardi)做中心的卡梅拉塔(Camerata)人士，以復興古希臘戲劇為目標所創造出來的作品，當做是上古早的歌劇，也是歌劇的誕生，因為上古早的柯爾西(Jacopo Corsi)佮佩里(Jacopo Peri)等等人創作的Dafne已經失傳矣，自按呢佩里的Euridice著變做現此時猶閣保存有完整樂譜的上古早的歌劇，卡契尼(Giulio Caccini)佮卡瓦列里(Emilio de' Cavalieri)等等後來的重要的作曲家，攏捌參加這个作品的演出。