Thó-lūn:N̂g Hiān-hôan

黃現璠

tóng-àn:黄现璠晚年在书房工作照.jpg

黃現璠

黃現璠(1899年11月13日 - 1982年1月18日)是中國現代出名的人類學家兼歷史學家，伊嘛是壯族歷史的開基祖佮八桂學派的頭人，捌佇中國的反右運動彼站仔，予中共拍做壯族抑是史學界上蓋大的右派，受著二十冬的迫害。 黃現璠教授在生的時佇民族學參歷史學遮的領域骨力拚勢，一世人寫過足濟優秀的作品，伊写的《廣西僮族簡史》佮《壯族通史》攏是中國頭一本研究壯族歷史的著作，伊写的《唐代社會概略》是中國頭一本研究唐朝社會的著作，伊写的《宋代太學生救國運動》是中國頭一本研究學生運動的著作。

經歷

---

1899年伊佇中國廣西省的扶綏縣出世，出世的時號做甘錦英，自細漢老母就過身--去，是老爸共他晟養大漢的，少年的時陣在家鄉的學堂讀冊，1922年考著"廣西省立三师"，1926年出業了后，考牢國立北京師範大學預科，佇遐學習中國歷史，是王桐齡、陶希圣佮蕭一山的學堂生，1932年熱人卒業，提著歷史學士的學位了后，由於他品學兼優，毋免考試入去北師大的研究所深造，綴陳垣佮朱希祖精研教育學佮歷史學，1935年提著教育碩士的學位，畢業了後，仝年11月去日本留學，佇東京帝國大學(這馬的東京大學)大學院讀冊，接受東大大學院教授和田清、加藤繁佮原田淑人的指導，專攻東洋史、日本史、民俗學。

1937年因為中日戰爭爆發，佇寒人倒轉去中國廣西，佇廣西大學教冊做先生，1940到1941年中間，佇廣西大學升起來做副教授矣，這以後，又閣轉去廣東，予中山大學聘請做教授，成做壯族頭一個教授。1942年8月，予国立桂林师范学院聘任做歷史教授，到甲1943年秋天，黃現璠閣再倒轉去廣西大學做教授，1949年熱天，升起哩兼任廣西大學訓導長，仝彼年冬尾，調到中文系兼任主任教授，1950年10月，又閣調任圖書館館長，1952年彼陣，中共推行高等學堂调整，他被派遣去廣西師范學院做歷史系的教授參閣再兼任圖書館館長，自按呢的30冬，伊攏佇遐廣西師范學院食頭路，黄现璠教授參其它的学者無仝，伊對1942年到甲1982年的40冬攏留蹛广西，為著壯族的學術事業拍拚，他佇做壯族的學術調查彼時，差不多共廣西行透透矣，提著真濟寶貴的考古和文字資料，嘛替壯族的人類學參民族學研究徛重要的基礎，1982年1月18號，因為腦溢血病，在廣西桂林過身，歲壽83，他往生了后，當時的廣西壯族自治區政府帶念黃現璠一世人做出的巨大貢獻，專工落葬伊在南寧的廣西壯族自治區革命公墓，1999年11月，捌佇廣西師范大學舉辦"黃現璠教授出世百冬紀念座談會"，散會了后，廣西師范大學编辑出版過《黃現璠教授誕辰百年紀念文集》參《黃現璠學術論文集》，現此時桂林中学佮广西师范大学各自徛有“黄现璠奖学金"參"黄现璠少数民族奖学金"。

在生的兼职

---

黃現璠在世的時，伊兼任過濟濟社會參學術職務，主要有：中央民族访问团广西分团（团长费孝通）副團長、第一屆全國人大代表、第一屆中国人民对外文化协会的理事、第一屆全国人大民族委员会的委员、中央对外文化联络委员会委员、第五屆全國政協委員、广西少数民族社会历史调查组頭人、頭一届中国民族学學会顾问、頭一届中国百越民族史研究会副会长、頭一届中国西南民族研究学会顾问佮《中国大百科全书·民族》编辑委员会委员遮的兼职。晚歲捌創辦漓江业余大学，佇遐做校长。

---

外口連結

---

• 桂海学术泰斗黄现璠，中国网，2009-07-17
• 梁黎，中国人类学民族学研究对新中国的贡献人民網，2008-05-12
• 代启福，中外著名的人类学民族学家肖像及简介（来源于百度），民俗学博客-Folklore Blogs，2009-03-25