Bāng Chhun-hong

Bāng Chhun-hong (Hàn-jī: 望春風) sī chi̍t siú Tâi-oân Ji̍t-pún sî-tāi ê Tâi-gí liû-hêng koa-khek. 1933 nî chhut-pán, iû Tēng Ú-hiân chok-khek, Lí Lîm-chhiu chok-sû, Sûn-sûn goân-chhiùⁿ. Chū 1930 nî-tāi būn-sè í-lâi, Bāng Chhun-hong chiū-sī Tâi-oân siōng siū-tio̍h hoan-gêng ê koa-khek chi-it. 2000 nî, tī chi̍t tiûⁿ chhiau-kòe 220,000 lâng chham-ú ê Koa-iâu Pah-nî Tâi-oân (歌謠百年台灣) oa̍h-tāng tiong, Bāng Chhun-hong pī soán-chòe sī siōng siū-tio̍h hoan-gêng ê lāu-koa. Lēng-gōa, Bāng Chhun-hong sū-iōng thoân-thóng gō͘-siaⁿ im-kai lâi kiat-ha̍p chiâⁿ-chòe te̍k-sû to̍k-iú ê iu-bí soân-lu̍t, pī chōe-chōe kok-ka jīm-tēng sī chin ū te̍k-sek ê Tâi-oân-tiāu (台灣調).