Hân-kok Bîn-chú-tóng

Hân-kok Bîn-chú-tóng (韓國民主黨 / 한국민주당) sī tī 1945 nî 9 goe̍h 18 hō chhòng-li̍p ê Tāi-hân Bîn-kok pó-siú-chú-gī chèng-tóng, mā sī Hân-kok to̍k-li̍p liáu-āu ê chi̍t ê chá-kî chèng-tóng chi-it, kán-chheng chò Hân-bîn-tóng (韓民黨 / 한민당). Hân-bîn-tóng ê tē-it jīm chú-se̍k chóng-bū sī iū-phài to̍k-li̍p ūn-tōng-ka Sòng Tìn-ú; 1945 nî 12 goe̍h, tī Sòng Tìn-ú pī àm-sat liáu-āu, iû Kim Sèng-chu kè-jīm. 1949 nî 1 goe̍h 26 hō, ūi-tio̍h beh cho͘-sêng hoán-tùi Lí Sêng-boán sè-le̍k ê chi̍p-kiat, Hân-bîn-tóng hām Sin E̍k-hi ê Tāi-hân Kok-bîn-tóng kap Tî Chheng-thian ê Tāi-tông Chheng-liân-thoân ha̍p-pèng chò Bîn-chú Kok-bîn-tóng.