Koan-tn̂g E̍k-hòa Thian-jiân-khì Chiap-siu-chām

Koan-tn̂g E̍k-hòa Thian-jiân-khì Chiap-siu-chām (觀塘液化天然氣接收站), koh kiò chò Tē-saⁿ Chiap-siu-chām (第三接收站) ia̍h Koan-tn̂g E̍k-hòa Thian-jiân-khì Chhiúⁿ (觀塘液化天然氣廠), kán-chheng Sam-chiap (三接), sī Tâi-oân ê Tâi-oân Tiong-iû Kong-si tng-teh heng-kiàn ê tē-saⁿ chō e̍k-hòa thian-jiân-khì chiap-siu-chām, tī Thô-hn̂g-chhī Koan-im-khu ê Tōa-thâm Koan-tn̂g Kang-gia̍p-khu kiam kang-gia̍p-káng lāi. Khí ê bo̍k-tek sī beh kā ùi kok-gōa chìn-kháu e̍k-hòa thian-jiân-khì (LNG) keng-kòe tû-chûn, ka-ap, khì-hòa kap kè-liōng liáu-āu, ēng thian-jiân-khì kóng-sòaⁿ sàng hō͘ kīn-óa ê Tâi-oân Tiān-le̍k Kong-si Tōa-thâm Hoat-tiān-chhiúⁿ sin-cheng #7, #8, #9 jiân-khì ho̍k-sûn-khoân hoat-tiān ki-cho͘, í-ki̍p pak Tâi-oân kî-thaⁿ jiân-khì tiān-chhiúⁿ, kang-chhiúⁿ oe-lô͘ kap bîn-seng ka-têng iōng-khì su-kiû, kàu-sî Tâi-oân pak, tiong, lâm kok ū chi̍t chō chiap-siu-chām.