Oa̍t-lâm lâng-miâ

Phó͘-thong ê Oa̍t-lâm-sek lâng-miâ ē-sài hūn 3-ê pō͘-hūn: "sèⁿ" (họ), "tiong miâ" (tên đệm) kap "miâ" (tên).

Sèⁿ

Oa̍t-lâm siāng toā ê sèⁿ sī Nguyễn (阮 [Ńg]), koh lâi sī Trần (陳 [Tân]), Lê (黎 [Lê]), Phạm (范 [Hoān]), kap Hoàng (黃 [N̂g]) téng-téng. Sèⁿ tī lâng miâ lāi-té sī pâi tī siāng thâu-chêng.

Tiong miâ

Tiong miâ chiàu koàn-sì thang kéng ê jī chin chió, cha-bó͘-lâng chha-put-to lóng ēng Thị (Hàn-jī siá "氏" [Sī]) lâi hō tiong miâ. Cha-po͘ ê tiong miâ khah chē khoán, m̄-koh mā sī Văn (文 [Bûn]) chiàm toā-hūn.

Oa̍t-lâm-lâng nā î-bîn khí Tâi-oân, Hiong-káng, he̍k-chiá kî-tha bô tiong miâ hē-thóng ê Hàn-miâ kok-ka, ū-sî ē kā tiong miâ theh tiāu.

Miâ

Miâ, ia̍h sī kóng "chheng miâ" (tên chính), sī si̍t-chè tāi-piáu chú-lâng ê jī. Tī chèng-sek ê tiûⁿ-ha̍p, Oa̍t-lâm lâng koàn-sì ēng miâ khì chheng-ho͘ lâng, chhan-chhiūⁿ "Nguyễn Văn Minh" sī chiàu miâ chheng chò "ông Minh" (ia̍h tio̍h sī "Minh sian-siⁿ" ê ì-sù), m̄-sī tòe sèⁿ kóng "ông Nguyễn".