Portal:Le̍k-sú/Selected article/4

Sam It Ūn-tōng (三一運動; 삼일 운동) sī Tiâu-sián tī Ji̍t Hân Pèng-ha̍p liáu-āu só͘ hoat-khí ê to̍k-li̍p ūn-tōng, in-ūi hoat-seng tī 1919 nî 3 goe̍h 1 hō, só͘-í hō-chòe "Sam It". Kin-á-ji̍t, 3 goe̍h 1 hō tī Hân-kok kah Tiâu-sián nn̄g kok lóng sī kok-tēng ká-ji̍t, tī Hân-kok hō-chòe Sam·It Chiat (3·1절). 1919 nî 3 goe̍h 1 hō, 33 ūi Hân-kok To̍k-li̍p-ūn-tōng chham-ú-chiá tī Kiaⁿ-siâⁿ chhī-tiong-sim ê Thap-tōng Kong-hn̂g hoat-pió "To̍k-li̍p Soan-giân". Che ín-khí chhī-bîn ê chi-chhî kah kun-sûi, tōa-siaⁿ hoah chhut "To̍k-li̍p bān-sòe" ê kháu-hō. Kâng sî-kan, Pêng-jiáng mā hoat-seng sī-ui oa̍h-tāng; āu-lâi chiām-chiām hiòng kui-ê Tiâu-sián thoàⁿ-khui.