Sè-kài Gîn-hâng Chi̍p-thoân
Sè-kài Gîn-hâng Chi̍p-thoân (Eng-gí: World Bank Group), sok-siá WBG, sī chi̍t ê pau-hâm ū 5 ê kok-chè cho͘-chit ê chi̍p-thoân, i-ê chóng-pō͘ tī Bí-kok Hôa-sēng-tùn Te̍k-khu. WBG tī Jī-chiàn bóe-kî (1944 nî) sêng-li̍p, i siāng chi̍t khai-sí ê sú-bēng sī pang-chō͘ tī sè-kài tāi-chiàn tiong pī phò-hoāi ê kok-ka ê tiông-kiàn. Chit-má ê jīm-bū sī "chiong-kiat ke̍k-tō͘ pîn-khùn, chhiok-chìn kiōng-hióng hoân-êng". WBG thàu-kòe hiòng khai-hoat-tiong kok-kathê-kiong kē-sek tāi-khoán, bû-sek tāi-khoán kap cheng-khoán lâi chu-chō͘ chia-ê kok-ka khek-ho̍k pîn-khùn, kok ki-kò͘ tī kiám-khin pîn-khùn kap thê-ko seng-oa̍h chúi-pêng ê sú-bēng hoat-hui to̍k-te̍k ê chok-iōng. Chia̍t-chí 2011 nî, WBG thê-kiong ê tāi-khoán lúi-chek chhiau-kòe 5000 ek Bí-kim.
WBG iû 5 ê ki-kò͘ cho͘-sêng, hun-pia̍t sī: Kok-chè Ho̍k-heng Khai-hoat Gîn-hâng, Kok-chè Khai-hoat Hia̍p-hōe, Kok-chè Kim-iông Kong-si, To-piⁿ Tâu-chu Tam-pó Ki-kò͘ kap Kok-chè Tâu-chu Cheng-toan Kái-koat Tiong-sim. Kî-tiong, Kok-chè Ho̍k-heng Khai-hoat Gîn-hâng kap Kok-chè Khai-hoat Hia̍p-hōe tiāⁿ pī ha̍p-chheng chò "Sè-kài Gîn-hâng".