Sió-khí-chèng

Sió-khí-chèng (Hàn-jī, 小齒症, Eng-gí, microdontia) sī chhùi-khí ê tōa-sió pí chèng-siông khah-sió, it-poaⁿ kan-tāⁿ hoat-seng tī éng-kiú-khí khí-lia̍t, siāng-chiap khòaⁿ--tio̍h-ê sī ko·-khí ê chêng-hêng, chhin-chhiūⁿ kóng hoat-seng tī téng-ham (頂頷, maxilla) ê éng-kiú chhek-mn̂g-khí (永久側門齒, permanent lateral incisor) kap tē-3 éng-kiú tōa-kiū-khí. Hoat-seng tī éng-kiú chhek-mn̂g-khí to̍h kiò-chò teng-á-hêng (peg-shaped) chhek-mn̂g-khí. Nā só·-ū ê chhùi-khí lóng hoat-seng siong-tùi-sèng chhùi-khí khah-sió ê chêng-hêng, tiāⁿ-tiāⁿ sī khí-chô-kut kòe-tōa ê iân-kò·. Chin-chiàⁿ ê kóng-hoān-sèng chhùi-khí kòe-sió sī khí-chô-kut hoat-io̍k chèng-siông, ah só·-ū ê chhùi-khí khak-si̍t thài-sió, chit-chióng chêng-hêng chiâⁿ hán-kìⁿ, kan-kāⁿ hoat-seng tī pituitary dwarfism kap tī chhùi-khí hoat-io̍k sî-kî chiap-siū liáu hòng-siā-sòaⁿ (放射線) he̍k hòa-ha̍k tī-liâu (化學治療) ê chêng-hêng.