Tâi-pak Chhī-li̍p Thian-bú Iá-kiû-tiûⁿ
| 這篇文章有漢字兮版本。 參考這篇文章兮漢字版本。 |
Tâi-pak Chhī-li̍p Thian-bú Iá-kiû-tiûⁿ, kán-chheng Thian-bú Iá-kiû-tiûⁿ, sī chi̍t-ê ūi tī Tâi-oân Tâi-pak-chhī Sū-lîm-khu Thian-bú ê iá-kiû-tiûⁿ, tī 1999-nî 8-goe̍h khé-iōng, piⁿ--á sī Thian-bú Ūn-tōng Kong-hn̂g. Thian-bú Iá-kiû-tiûⁿ lāi-iá ú 10,000 ê chē-ūi, gōa-iá in-ūi beh lâu khí kī-tàn ê só͘-chāi, bô siat-tì chē-ūi; 2020-nî kái-chò jîn-kang chháu-pêⁿ, chiâⁿ-chò choân Tâi-oân tē-1-ê sú-iōng jin-kang chháu-pêⁿ ê chit-pāng kiû-tiûⁿ [chù 1].
Thian-bú Iá-kiû-tiûⁿ goân-té bô beh chò chit-pāng ê kiû-tiûⁿ, só͘-í kan-na siat-kè 6000-ê chē-ūi, āu--lâi ūi-tio̍h beh kí-pān kok-chè pí-sài chiah kái-chò 10,000-ê chē-ūi. Chhú-gōa, Thian-bú Iá-kiû-tiûⁿ mā in-ūi hù-kīn ê ki-bîn hoân-ló nā ū chit-pāng pí-sài ē siuⁿ chhá, só͘-í mā kìm-chí chit-pāng pí-sài tī chia phah. Āu-lâi tī chhī-chèng-hú hâm Tiong-hôa Chit-pāng khì kah ki-bîn ko͘-thong, chhiâu hó-sè liáu-āu, tī 2002-nî khai-hòng chit-pāng pí-sài, Tiong-chit sûi tī 5-goe̍h 11 kí-pān Thian-bú Iá-kiû-tiûⁿ ê thâu-1-pái Tiong-chit pí-sài.
M̄-koh Thian-bú iu-goân ū chiâⁿ chē te̍k-pia̍t ê kui-tēng, pau-hâm chhiau-kòe 10-tiám bē-sái iōng khok-siaⁿ siat-pī kah ga̍k-khì ka-iû, lē-hêng-sài nā chhiau-kòe 10-tiám tio̍h bē-sái koh phah iân-tn̂g-sài (nā-sī 10-tiám ê sî-chūn í-keng leh phah iân-tn̂g-sài--ah tio̍h-sī phah kah hit-kio̍k kiat-sok). Goân-té koh-ū kui-tēng pài-it kah pài-sì bē-sái pâi pí-sài, āu-lâi tī 2022-nî kái-chò chi̍t lé-pài siōng chē ē-tàng pâi sì tiûⁿ.
- ↑ Tâi-lâm Iá-kiû-tiûⁿ bat tī 1970 nî-tāi iōng kòe jîn-kang chháu-pêⁿ, m̄-koh hit-tang-chūn bô chit-pāng pí-sài. Āu-lâi tio̍h kái tńg-khì thian-jiân chháu-phêⁿ.
 | Pún bûn-chiuⁿ sī chi̍t phiⁿ phí-á-kiáⁿ. Lí thang tàu khok-chhiong lâi pang-chō͘ Wikipedia. |