Dungeons & Dragons

Dungeons & Dragons (kán-lio̍k chò D&D ia̍h DnD; Eng-gí ì-sù: "Tē-hā-siâⁿ kap Lêng") sī chi̍t khoán khóng-sióng toh-téng RPG, goân-chho͘ ê siat-kè-chiá sī Gary Gygax kap Dave Arneson, tāi-seng sī 1974 nî TSR kong-si hoat-hêng--ê. Chū 1997 nî khai-sí ê hoat-hêng-siong sī Wizards of the Coast (chit-má sī Hasbro chú-koan-si). D&D hông phó͘-phiàn jīn-ûi sī hiān-tāi RPG ê khai-sí.

Iû-hì khài-lám

Dungeons & Dragons sī chi̍t ê ū kiat-kò͘ m̄-koh kiat-kio̍k khai-hòng (open-ended) ê kak-sek poaⁿ-ián iû-hì. Che iû-hì bô bêng-khak hān-chè chò-hóe sńg ê jîn-sò͘, it-poaⁿ lâi kóng ē ū 3~5 ūi ī-chiá (奕者), chham chi̍t ūi chú-chhî-jîn (hō-chò Tē-hā-siâⁿ Siâⁿ-chú; Eng-gí: Dungeon Master; DM). Chi̍t ūi ī-chiá thong-siông kan-na ē poaⁿ-ián chi̍t ūi kak-sek, chit-ê kak-sek tī hi-kò͘ ê sè-kài tang-tiong seng-oa̍h. Ī-chiá kak-sek (it-poaⁿ hō-chò lāng-hiám-chiá (弄險者); Eng-gí: player characters; PCs) ē cho͘-chit-chò chi̍t ê thoân-tūi, ta̍k-ê lâng ēng ka-kī ê lêng-le̍k lâi ta̍t-sêng bo̍k-phiau. Tī sńg ê kòe-têng tang-tiong, ta̍k-ê ī-chiá lóng ài koat-tēng ka-kī ê kak-sek beh án-chóaⁿ hêng-tōng, jî-chhiáⁿ hām pa̍t-ê kak-sek hō͘-tōng. Kak-sek hō͘-tōng tāi-pō͘-hūn sī ī-chiá iōng kóng--ê lâi piáu-ta̍t, a̍h-sī iōng bûn-jī lâi piáu-hiān. Tû-liáu che í-gōa, mā put-sî ē ūn-iōng-tio̍h chham-ú-chiá ê su-lí lêng-le̍k, ki-pún soàn-su̍t, kap sióng-siōng-le̍k. Oân-sêng chi̍t tiûⁿ iû-hì ê sî-kan m̄-sī chóa-tùi--ê. Beh kiat-sok chi̍t tiûⁿ "lāng-hiám" (adventure), it-poaⁿ lâi kóng, tio̍h-ài ī-chiá chē-pái ê chū-hōe. Kā chi̍t ê kò͘-sū kóng hō͘ soah tio̍h hō-chò chi̍t tiûⁿ "lāng-hiám"; nā-sī chē-chē ê lāng-hiám tàu chò-hóe chiâⁿ-chò chi̍t ê tn̂g-phiⁿ sū-kiāⁿ, lán ē kā hō-chò "chiàn-ia̍h" (campaign).