Gî-lân-thiaⁿ

Gî-lân-thiaⁿ (宜蘭廳) sī Tâi-oân tī Ji̍t-pún thóng-tī sî-tāi ê chi̍t ê hêng-chèng-khu, tī 1897 nî 6 goe̍h 10 hō siat-li̍p. In-ūi hit-tong-sî 3 koān 1 thiaⁿ ê hêng-chèng khu-he̍k siuⁿ toā, só͘-í Ji̍t-pún tong-kio̍k kā hit-tang-chūn Tâi-pak-koān ê Gî-lân-chi-thiaⁿ kái-chè chò to̍k-li̍p ê Gî-lân-thiaⁿ. 1897 nî chho͘ siat ê Gî-lân-thiaⁿ koán-hat Thâu-ûi, Gî-lân, Lô-tong kap Lī-te̍k-kán 4 ê pān-bū-sú. 1901 nî 11 goeh, kā pān-bū-sú kái chò chhut-tiuⁿ-só͘; siat-li̍p Gî-lân, Ta-khe, Thâu-ûi, Tang-káng, Lô-tong, Pat-lí-sa, Lī-te̍k-kán kap So͘-ò 8 ê chhut-tiuⁿ-só͘. Kāng-nî, choân Tâi-oân ùi 3 koān 4 thiaⁿ kái chò 20 thiaⁿ, ē-kha hun-pia̍t siat chi-thiaⁿ, Gî-lân-thiaⁿ tû-liáu thiaⁿ-tī só͘-chāi-tē, koh lēng-goā siat-li̍p Thâu-ûi, Lô-tong kap Pat-lí-sa 3 ê chi-thiaⁿ.