Tâi-pak-koān (Ji̍t-pún sî-tāi)
Tâi-pak-koān (臺北縣) sī Tâi-oân tī Ji̍t-pún thóng-tī sî-tāi chho͘-kî (1895 nî ~ 1901 nî) ê chi̍t ê koān-kip ê hêng-chèng-khu.
1895 nî 6 goe̍h 28 hō, ùi Chheng-tiâu thóng-tī sî-tāi bóe-kî ê Tâi-pak-hú kái-chè lâi ê, koán-hat-khu hâm-kài Tâi-oân pak-pō͘, pau-hâm chit-má ê Tâi-pak-chhī, Sin-pak-chhī, Ke-lâng-chhī, Thô-hn̂g-chhī, Gî-lân-koān, Sin-tek-koān kap Sin-tek-chhī.
1897 nî 5 goe̍h 3 hō, choân Tâi-oân kái-chè chò 6 koān 3 thiaⁿ ê sî, Sin-tek-koān kap Gî-lân-thiaⁿ ùi Tâi-pak-koān hun-thiah chhut-lâi, Tâi-pak-koān ê koán-khu kan-na chhun chit-má Tâi-pak-chhī, Sin-pak-chhī, Ke-lâng-chhī kap Thô-hn̂g-chhī ê tang-poàⁿ-pō͘.
1898 nî 6 goe̍h 18 hō, 6 koān 3 thiaⁿ koh kái-chè chò 3 koān 3 thiaⁿ, Tâi-pak-koān ê koán-khu hām khah-chá ê Tâi-pak-hú beh-kāng, tān-sī í-keng bô pau-hâm Gî-lân tē-khu.
1901 nî, Tâi-oân kái-chè chò 20 thiaⁿ, Tâi-pak-koān pī hòe-chí, hun-thiah chò Tâi-pak-thiaⁿ, Ke-lâng-thiaⁿ, Chhim-kheⁿ-thiaⁿ, Thô-á-hn̂g-thiaⁿ kap Sin-tek-thiaⁿ 5 ê thiaⁿ-kip ê hêng-chèng-khu.