Gwisil Boksin

Kúi-sek Hok-sìn (鬼室福信, 귀실복신, Gwisil Boksin), mā hō-chòe Hû-û Hok-sìn(扶餘福信, 부여복신), sī Pek-chè boán-kî ê chèng-tī jîn-bu̍t kah chiong-kun.

Seng-pêng

Kúi-sek sī Pek-chè kok-ông Hû-û Chiong(扶餘璋) ê sun-á, Gī-chû-ông(義慈王) ê chik-peh.

660 nî, Tông-tiâu kah Sin-lô ê liân-kun siau-bia̍t Pek-chè, hu-ló͘ Gī-chû-ông. Kúi-sek Hok-sìn hióng Ji̍t-pún chhéng-kiû kun-sū goān-chō͘, siūⁿ-beh ho̍k-heng Pek-chè.

Keh-nî, Chê-bêng Thian-hông(齊明天皇) chhin-sin kiâⁿ-chûn kòe-hái, chún-pī beh goán-cheng siu-ho̍k Pek-chè, tān-sī khiok tī hit nî 7 goe̍h kòe-sin.

Thian-tì Thian-hông(天智天皇) tī 662 nî 5 goe̍h, kā Pek-chè ông-chú Hû-û Hong(扶餘豊) sàng tńg-khì Pek-chè, hō Kúi-sek Hok-sìn iòng-hō͘ ûi sin kok-ông. Ji̍t-pún mā khai-sí goān-chō͘ Pek-chè.