Itô Hirobumi

Ji̍t-pún ê chi̍t ê chèng-tī jîn-bu̍t
(Tùi Itō Hirobumi choán--lâi)

Itô Hirobumi (Ji̍t-pún-gí: 伊藤 博文; 1841 nî 10 goe̍h 16 ji̍t – 1909 nî 10 goe̍h 26 ji̍t) sī chi̍t uī chhut-sin Tyôsyû hoan ê Samurai, āu-lâi sêng-uî Ji̍t-pún tē-it uī Loē-koh Chóng-lí Tāi-sîn, chêng-āu lóng-chóng 4 jīm (tē 1, 5, 7 kah 10 jīm). I choè-āu tī Hah-ní-pin hō͘ Hân-kok ài-kok jîn-sū An Jung-geun chhìng-sat koè-sin. Chèng-tī jîn-bu̍t kiam chok-ka ê Suematu Kentyô sī i ê khè-kiáⁿ, kah in cha-bó͘-kiáⁿ Ikuko kiat-hun.

Itô Hirobumi.

Wikimedia Commons téng ê siong-koan tóng-àn: Itō Hirobumi

Seng-pêng siu-kái

Itô Hirobumi ê chhin-seⁿ lāu-pē sī Hayasi Zyûzô, i pún-miâ hō-chò Hayasi Risuke. 1863 nî, Itô hō͘ lâng soán chò Tyôsyû ngó͘ kia̍t, liû-ha̍k Lûn-tun Tāi-ha̍k Ha̍k-īⁿ. Itô kiàn-sik tio̍h Eng-kok ê sian-chìn chè-tō͘, i siong-sìn Ji̍t-pún mā eng-kai si̍t-hêng, chiah ū châi-tiāu chìn-pō͘ kah hoat-tián. Keh-tńg-nî, i tńg-khì kàu Ji̍t-pún, khai-sí soeh-ho̍k kah kíng-kò Tyôsyû hoan m̄-thang kah goā-kok hoat-seng chiàn-cheng. Tông-sî, i mā kah Ernest Satow sio-tú, nn̄g lâng sêng-uî it-seng ê pêng-iú.