Khí-hoāⁿ
(Tùi Khí-hōaⁿ choán--lâi)
Khí-hōaⁿ (gingiva) koh kiò-chò khí-gîn, ūi-tī chhùi-khí khí-kún-pō· ê sì-piⁿ, kap khí-chô-kut ê gōa-bīn. Khí-hōaⁿ hō·-lâng jīn-ûi sī phôe-hu ê 1-chióng, keng-kòe gián-hòa chiâⁿ-chò liâm-moh (mucous membranes). Khí-hōaⁿ ki-pún-siōng sī thàu-bêng--ê, in-ūi hiat-e̍k-sûn-khoân sú-tit i hián-sī chò hún-âng-sek. Khí-hōaⁿ sio̍k-î khí-chiu-cho·-chit (periodontium) ê 1-pō·-hūn, ū pó-hō· khí-thâu ê kong-lêng. Chhùi-khiuⁿ ōe-seng nā-sī chò-liáu bô sè-jī, ē-tit ín-khí khí-hōaⁿ-iām he̍k khí-chiu-iām téng-téng ê khí-chiu-pēⁿ.
