Kok-thài Jîn-siū
Kok-thài Jîn-siū Pó-hiám Kó͘-hūn Iú-hān Kong-si (國泰人壽保險股份有限公司), káng-chheng Kok-siū (國壽), sī chi̍t keng Tâi-oân ê jîn-siū pó-hiám kong-si; chóng-pō͘ siat tī Tâi-pak-chhī Tāi-an-khu. Kok-thài Jîn-siū sī Kok-thài Kim-iông Khòng-kó͘ kî-hā ê chi̍t keng chú-kong-si. 2018 nî Bí-kok Fortune cha̍p-chì tiong pâi choân-kiû tē-410 tōa kong-si.
Kok-thài Jîn-siū tī 1957 nî 8 goe̍h 15 hō iû Chhòa Bān-chhun kap Chhòa Bān-lîm hiaⁿ-tī nn̄g lâng kiōng-tông chhòng-li̍p, mā sī Lîm-oân Chi̍p-thoân kap chi̍p-thoân kî-hā ê Kok-thài Kim-khòng ê he̍k-sim khì-gia̍p. 1964 nî 11 goe̍h 7 hō, Kok-thài Jîn-siū kó͘-phiò tī Tâi-oân Chèng-koàn Kau-e̍k-só͘ kòa-pâi, kó͘-phiò tāi-hō 2882, sī Tâi-oân tē-it keng kó͘-phiò chiūⁿ-chhī ê pó-hiám kong-si.
2004 nî 12 goe̍h, Kok-thài Jîn-siū kap Tiong-kok Tang-hong Hâng-khong kiōng-tông chhut-chu tī Tiong-kok Siōng-hái siat-li̍p Kok-thài Jîn-siū Pó-hiám Iú-hān Chek-jīm Kong-si (國泰人壽保險有限責任公司). 2005 nî 1 goe̍h 24 hō, Kok-thài Jîn-siū Pó-hiám Iú-hān Chek-jīm Kong-si chèng-sek tùi-gōa siau-siū pó-toaⁿ. 2005 nî 2 goe̍h 24 hō, Kok-thài Jîn-siū Iú-hān Chek-jīm Kong-si tī Siōng-hái Kok-chè Hōe-gī Tiong-sim kí-hêng khai-gia̍p tián-lé. Kok-thài Jîn-siū ùi 2005 nî khai-sí lio̍k-sio̍k tī Tiong-kok ê chú-iàu siâⁿ-chhī siat-tì hun-kong-si kap ho̍k-bū kì-tiám, sī tē-it keng he̍k-chún tī Tiong-kok siat-li̍p hun-kong-si ê Tâi-oân kim-iông kong-si. 2008 nî 7 goe̍h 4 hō, Kok-thài Jîn-siū tī Oa̍t-lâm Ô͘-chì-bêng-chhī to̍k-chu siat-li̍p Oa̍t-lâm Kok-thài Jîn-siū (越南國泰人壽), só͘-tēng tī Oa̍t-lâm tâu-chu ê Tâi-siong kap tong-tē bîn-chiòng ǔi-chú ê siū-hiám chhī-tiûⁿ.