Kong-bêng-seng 4-hō

Kong-bêng-seng 4-hō (Gān: 광명성4호; Hàn: 光明星4號) sī Tiâu-sián Kok-ka Ú-tiū Khai-hoat-kio̍k tī 2016 nî 2 goe̍h 7 hō chá-khí 9-tiám hoat-siā seng-khong ê chi̍t lia̍p tē-kiû koan-chhek ōe-seng. Kin-kì Pak-hân koaⁿ-hong mûi-thé ê pò-tō, ōe-seng tī hoat-siā 9-hun 46-bió liáu-āu sūn-lī chìn-ji̍p kúi-tō. Tān-sī Lâm-hân Kok-hông-pō͘ ê siong-koan jîn-sū piáu-sī kóng, Pak-hân só͘ hoat-siā ê sī chi̍t lia̍p hui-toâⁿ, i-ê hóe-chìⁿ tī it-kip thui-chìn-khì hun-lī liáu-āu tiō ùi Lâm-hân hong-bīn ê lûi-ta̍t téng siau-sit, hoat-siā hêng-tōng kám ū sêng-kong iáu-koh ài tiau-cha.