Lîm Seng-siông
Lîm Seng-siông (林生祥, Kheh-gí Pheng-im: Limˇ Senˊ Xiongˇ; 1971 nî 11 goe̍h 25 ji̍t chhut-sì ) sī Ko-hiông-koān Bí-lông-tìn (taⁿ--ê Ko-hiông-chhī Bí-lông-khu)--ê Kheh-ka chhòng-chok koa-chhiú. Bat chhòng-li̍p Koan-á Im-ga̍k-kheⁿ (觀子音樂坑), āu-lâi piàn-chò Kau-kong ga̍k-thoân (交工樂團)), lo̍h-boé tī Seng-siông kap Hiā-iô-kheⁿ 3 (生祥與瓦窯坑3), Seng-siông kap Ga̍k-thoân, í-ki̍p Seng-siông Ga̍k-tūi.
The̍h-tio̍h Kim-khek-chióng--ê Choè-ka Chok-khek-jîn kap Hui (非) Liû-hêng Im-ga̍k Chok-phín Lūi (類) Choè-ka Chè-chok-jîn--ê chióng, Tē 54 Kài Kim-má-chióng--ê Choè-ka Goân-chhòng Tiān-iáⁿ Im-ga̍k Chióng kap Choè-ka Goân-chhòng Tiān-iáⁿ Koa-khek Chióng téng chióng-hāng.
Pōe-kéng
siu-káiLîm Seng-siông ko-tiong tùi Tâi-lâm Jī-tiong pit-gia̍p, tāi-ha̍k tī Tām-kang Tāi-ha̍k oân-sêng i ê ko-téng kàu-io̍k ha̍k-ūi. Tī thak tāi-ha̍k ê sî-chūn, i chhòng-li̍p Koan-chú Im-ga̍k-kheⁿ ga̍k-thoân, tī lāi-té tôaⁿ gih-tah kiam chò chú-chhiùⁿ. Chheh thak liáu i to̍h tńg--khì kò͘-hiong Bí-lông, goân-lâi ê Koan-chú Im-ga̍k-kheⁿ ga̍k-thoân kái-cho͘ chò Ōaⁿ-kang Ga̍k-tūi (Kau-kang Ga̍k-tūi), i tī lāi-té tû-liáu kâng-khoán tôaⁿ gih-tah kap chhiùⁿ-koa, mā koh kiam tôaⁿ goe̍h-khîm kap sam-hiân. Āu-lâi, Ōaⁿ-kang Ga̍k-tūi mā kái-sòaⁿ, Lîm Seng-siông ōaⁿ cho͘ chi̍t-ê ga̍k-thoân kiò Seng-siông kap Hiā-iô-kheⁿ 3, i tī lāi-té tôaⁿ gih-tah koh chhiùⁿ-koa, ga̍k-thoân bóe-á ū hoat-piáu chi̍t tiuⁿ choan-chip, "Lîm-àm."