O͘-lián
(Tùi O͘lián choán--lâi)
- Koan-hē Tâi-oân-ōe kóng ê te̍k-pia̍t chi̍t khoán hî-chiuⁿ si̍t-phín, khòaⁿ "o͘-lián (hî-chiuⁿ chè-phín)".
O͘-lián (tha̍k ŏ͘-lián; Ji̍t-gí: おでん), chi̍t chióng goân-thâu tī Ji̍t-pún Koan-tang tē-khu ê liāu-lí, mā sī Tâi-oân ê 1 chióng kán-tan ê liāu-lí. Tī Koan-tang í-gōa ê só·-chāi mā ū hō-chò Koan-tang-chú (關東煮) iah-sī Koan-tang-chhoe (関東炊き). Châi-liāu it-poaⁿ pau-koah ke-nn̄g, chhài-thâu, soaⁿ-chî (蒟蒻), tikuwa (竹輪). Chiah-ê liāu lóng lok ji̍p-khì chham kûn-tòa-chhài (コンブ) iah-sī chhâ-hî (鰹節) ê thng-thâu lāi-bīn chú. Ē-sái-tit phòe pn̄g chia̍h, mā ē-sái chia̍h chhit-thô.
O·-lián phēng it-poaⁿ ê hóe-ko-chia̍h khah kán-tan, châi-liāu sûi-sî ē-iōng-tit chham--lo̍h-khì. Koâⁿ-thiⁿ-sî lâng te̍k-pia̍t hèng chia̍h. Tī Ji̍t-pún, o·-lián tī piān-lī kám-á-tiàm iah-sī lō·-piⁿ-tàⁿ-á lóng ū tè bé.