"Tâi-ôan Ū Kôan Ka-ji̍p Liân-ha̍p-kok" ê Soan-giân
"Tâi-ôan Ū Kôan Ka-ji̍p Liân-ha̍p-kok" ê Soan-giân sī Tâi-oân Ki-tok Tiúⁿ-ló Kàu-hōe tī 2007 nî 12 goe̍h 7 hoat-piáu ê soan-giân, ēng 3 chióng gí-giân, 4 chióng pán-pún hoat-piáu.
Choân-bûn siu-kái
"Tâi-ôan Ū Kôan Ka-ji̍p Liân-ha̍p-kok"
Kià hō͘ Liân-ha̍p-kok kok hōe-ôan-kok tāi-piáu, sè-kài àì hô-pêng ê kok-ka jîn-bîn, kap phó͘͘-sè ê kàu-hōe:
Tī Liân-ha̍p-kok 59-nî-chêng hoat-piáu "Jîn-kôan Soan-giân" ê chiân-se̍k, pún Tâi-ôan Ki-tok Tiúⁿ-ló Kàu-hōe, kun-kù i ê 1977-nî "Jîn-kôan Soan-giân" kap 1985-nî "Sìn-gióng Kò-pe̍k" ê cheng-sîn, hoat-piáu ē-bīn ê soan-giân:
Tùi 1945-nî, Tē-2-chhù Sè-kài Tāi-chiàn kiat-sok liáu-āu, chôan-kiû hō͘ lâng kóan ê si̍t-bîn-tōe jîn-bîn, chiàu chū-koat ê ki-pún jîn-kôan, saⁿ-kè-sio̍k cheng-chhú tio̍h chòe to̍k-li̍p kok-ka ê toē-ūi. To̍k-to̍k Tâi-ôan 2300-bān jîn-bîn, it-ti̍t kàu kim-jît in eng-kai ū ê kok-chè jîn-keh, iáu pī hut-lio̍k, siū pâi-tû tī Liân-ha̍p-kok tōa-mn̂g-gōa. Che m̄-nā hián-chhut Liân-ha̍p-kok "Sè-kài Jîn-kôan Soan-giân", iáu bô lo̍k-si̍t chôan-kiû--ni̍h, siōng-chhiáⁿ lō͘-chhut Liân-ha̍p-kok tùi Tâi-ôan jîn-bîn ki-pún jîn-kôan ê chhim-hāi.
Tâi-ôan jîn-bîn sui-jiân tāi-tāi siū gōa-lâi si̍t-bîn thóng-tī khiok ōe-tit-thang ēng bô liû-hiat ê bîn-chú thêng-sū, tī 1996-nî tē-it-pái keng-iû jîn-bîn ti̍t-sóan Tâi-ôan ê chóng-thóng. M̄-nā kan-ta án-ni, koh tī 2000-nî, tī hô-pêng-tiong ôan-sêng chèng-kôan ê î-chóan, chiū-sī iû pún-thó͘ chèng-thôan "Bîn-chú Chìn-pō͘-tóng" chip-chèng, lâi thè-ōaⁿ ēng kài-giâm si̍t-bîn thóng-tī sò͘-cha̍p-nî ê "Tiong-kok Kok-bîn-tóng". Taⁿ kin-á-ji̍t Tâi-ôan jîn-bîn kiông-lia̍t iàu-kiû ēng Tâi-ôan ê miâ-gī ka-ji̍p Liân-ha̍p-kok.
Chóng--sī Tâi-ôan sai-pêng ê kiông-kôan Tiong-kok, ēng ah-pà ê chok-hong khòng-chè kok-chè siā-hōe, it-chài bú-jio̍k, táⁿ-ap, koh ko͘-li̍p Tâi-ôan, tì-kàu Tâi-ôan ê ki-pún jîn-kôan siū thún-ta̍h. Tùi án-ni góan kám-kak pi-siong ê hùn-khài, nā-sī góan iáu-kú khak-sìn jîn-kôan sī Siōng-tè só͘-sù, Tâi-ôan ū kôan ka-ji̍p Liân-ha̍p-kok, hō͘ Tâi-ôan jîn-bîn ê chun-giâm siū kok-chè siā-hōe, tit eng-kai ū ê chun-tiōng.
In-ūi án-ni góan kiōng-kèng sêng-khún, koh giân-siok-tōe hiòng Liân-ha̍p-kok kok hōe-ôan-kok tāi-piáu, sè-kài ài kong-gī hô-pêng ê kok-ka jîn-bîn, kap phó͘-sè ê kàu-hōe ho͘-io̍k: Chhiáⁿ ióng-kám ūi pī kū-cho̍at tī Liân-ha̍p-kok mn̂g-gōa ê Tâi-ôan-lâng chú-chhî chèng-gī, chi-chhî koh chhiok-sêng hō͘ Tâi-ôan chiâⁿ-chòe Liân-ha̍p-kok ê hōe-ôan-kok, kiōng-tông lâi chhiok-chìn kong-gī kap sè-kài hô-pêng.
"Sè-kan-lâng ah, Siōng-Chú bat chí-sī lí sím-mi̍h sī hó, I ài lí sím-mi̍h? To̍k-to̍k ài lí kiâⁿ kong-gī, sim chûn lîn-bín, khiam-pi kap lí ê Siōng-tè saⁿ-kap kiâⁿ." (Bí-ka 6:8)
Gōan Siōng-tè chiok-hok Liân-ha̍p-kok, sè-kài kok-kok jîn-bîn, kap phó͘-sè ê kàu-hōe. Amen
Tâi-ôan Ki-tok Tiúⁿ-ló Kàu-hōe Chóng-hōe
Gī-tiúⁿ: Phoaⁿ Khèng-chiong
Chóng-kàn-sū: Tiuⁿ Tek-khiam
2007-nî 12-go̍eh 7-ji̍t