Thó-lūn:Bāng-chì

網誌

網誌 (blog)是一種網路媒體的形式，典型的網誌是一个捷捷更新的網站，伊的內容一般針對其他的網站的文章、消息抑是資源做紹介抑是評論，按照傳統，上新的文章彼網頁上頂懸，較舊的文章按照日期、題目收去佇倉庫 [1] 網誌的主題濟濟款。

網誌這詞佮英文的weblog、blog平行使用，會使當做是同義詞，一般認為上代先用weblog這詞的是瓊恩‧巴杰(Jorn Barger)，佇1997年12月。網誌這詞對2003年5月臺語文Weblog中心設站了後開始出現。

網誌的類別

網誌會使指個人的的網誌，這款網誌袂輸傳統的日誌，提供作者公開寫出伊的心聲，包括伊對日常生活的觀察佮想法，伊的起毛摺、藝術創作等等，網誌的作者會當一个以上，可比講家庭一家伙抑是朋友的箍仔，大部份的網誌開放予人留話回應。見若鬧熱起來，成做一个固定的討論箍仔，文章本身變成討論的初發點爾爾。

網誌的主題抑是目的萬萬種，袂少網誌興發表對主流政治、文化抑是其他公共事物的觀察抑是評論，臺灣的TWblog.net是一个咧。

行動網誌(Moblog)是mobile佮blog的合詞，是透過行動電話(手機仔)發消息、貼相的網誌。

網誌的家私佮科技

專門為網誌用者設計的軟體愈來愈濟，現代的網誌軟體無要求會曉任何電腦語言 (包括超文件標示語言)(HTML)，對編輯、出版到管理回應文、推銷文章， 攏包含在內。

因為網誌強調時間性，部份軟體會踮網站顯示月拆仔抑是其他整理舊文章的法度。

為欲方便網誌相對話，Movable Type的設計人發明"牽轉來" (trackback)的機制，發表佇2002年。

網誌的內容嘛定定用RSS、Atom的可擴張標記語言(XML)資料格式出版，這款檔案方便站外的機器解答佮顯示上新的內容("聯佈"，syndication)，嘛有網站專門登記、收集、整理佮顯示對濟濟所在掠來的檔案。

鶴佬話網誌的歷史

2003年5月才出現用專業網誌軟體出版的鶴佬語網誌：臺語文Weblog中心(編碼用萬國碼)佮Taiwanese Blog (用臺語文軟體(Taiwanese Package))，進前雖罔已經有類似的網站佇咧(親像臺灣文學工作室、暗光鳥的厝)，卻是無用網誌軟體編輯、出版；負責人嘛無認為(人因)的網站號做網誌。

站外資源

• Moblogging.org
• Archive.org 保存的舊版臺語文 Weblog 中心
• 'Blog' 佇線頂字典排第一名