1001 Mî

1001 Mî (Pho-su-bûn: هزار و یک شب, Hazār-o Yak Šab; A-la-pek-bûn: كتاب ألف ليلة وليلة, Kitāb 'Alf Layla wa-Layla) sī tùi A-la-pek kap Pho-su thoân--chhut-lâi ê chi̍t-hē-thóng ê kò͘-sū, chit-pún bûn-chi̍p sī tiong-sè-kí Sai-lâm-a (Tiong-tang) ê bûn-ha̍k sū-sū-si, chú-tê sī kóng 1-ê hō-chò Shahryar ê kok-ông in-ūi bó͘ hoán-poē--i, choaⁿ-á ta̍k-àm lóng kap 1-ê chāi-sek-lú khùn, thiⁿ-kng tō kā thâi--sí. Chái-siòng ê cha-bó͘-kiáⁿ Scheherazade (Pho-su ê Shahrzad) soah kam-goān kè hō͘ ông, ūi-tio̍h mài khì hō͘ ông tī thiⁿ-thiah-ha̍h tō kā thâi--sí, i ta̍k-àm kóng-kó͘ hō͘ i ê ang-sài thiaⁿ, koh thiau-kang ta̍k-àm lóng kā kò͘-sū thêng tī leh hō͘ lâng sim-koaⁿ hiāuⁿ-hiāuⁿ chin kín-tiuⁿ ê só͘-chāi, ti̍t-ti̍t kóng chhiau-koè 1001-mê.

Khêng-si̍t che kui-thò kò͘-sū chhòng-chok ê sî-kan èng-kai ū ēng kúi-ā-ê sè-kí. Kóng-kó͘ ê lâng koh-iūⁿ, koh kóng-kó͘ ê chhiú-lō͘ mā koh-iūⁿ, chóng--sī chiah-ê kò͘-sū ū-iáⁿ soà-phah, khah chhut-miâ--ê pí-lūn: Aladdin, Ali Baba kap 40-ê cheng-piàng, hām Chúi-hu Sinbad 7-pái koè-iûⁿ téng-téng, sǹg sī chha-put-to ta̍k-só͘-chāi lóng tiāⁿ thiaⁿ-tio̍h ê kò͘-sū.