Hoat-lân-se si̍t-bîn tè-kok
Hoat-lân-se si̍t-bîn tè-kok (Empire colonial français) sī Hoat-kok tī 17 sè-kí kàu 1960 nî-tāi tiong-kan só͘ khòng-chè ê chē-chē tè i̍t-bîn-tē. Tī 19 kàu 20 sè-kí chho͘-kî, i chiâⁿ-chò sè-kài tē-jī tōa si̍t-bîn tè-kok, tē-it sī Tāi-eng Tè-kok. Tī 1919 kàu 1939 nî chit-ê tian-hong sî-kî, i hâm-kài 1234.7-bān pêng-hong kong-lí ê thó͘-tē. Nā-sī kā Hoat-kok pún-thó͘ iā sǹg ji̍p-lâi ê ōe, i-ê biān-chek tiō ū 1289.8-bān pêng-hong kong-lí, chiàm sè-kài thó͘-tē chóng biān-chek ê 8.6%. Chia-ê si̍t-bîn-tē tī 20 sè-kí ta̍uh-ta̍uh-á to̍k-li̍p liáu-āu, kàu-taⁿ kan-na pó-liû hun-pò͘ chāi pak Tāi-se-iûⁿ, Carib Hái, Ìn-tō͘-iûⁿ, lâm Thài-pêng-iûⁿ kap pak Thài-pêng-iûⁿ kúi pah ê bô-kāng ê tó-sū ia̍h-sī kûn-tó, lēng-gōa iáu-koh ū Hoat-kok léng Lâm-hong kap Lâm-ke̍k Tē-he̍k, chóng biān-chek ū 12.315-bān pêng-hong kong-lí; che sī 1939 nî sî ê 1%.
