Lūi-chi̍p Ngá-sio̍k-thong Si̍p-ngó͘-im

Lūi-chi̍p Ngá-sio̍k-thong Si̍p-ngó͘-im (Hàn-jī: 彙集雅俗通十五音) sī 1818 nî Siā Siù-lâm pian-choān sêng ê chi̍t phō í Chiang-chiu-ōe ûi-chú ê Bân-lâm-gí im-ūn-ha̍k ê chheh, bóe-á Gân Kím-hôa koh tī 1869 nî khek-pán ìn-hêng. I chhái-iōng âng kap o͘ nn̄g sek ìn-soat, koh kiò-chò Âng-jī Si̍p-ngó͘-im (紅字十五音), mā kiò-chò Cheng-chù Ngá-sio̍k-thong Si̍p-ngó͘-im (增註雅俗通十五音). I-ê lōe-iông í ūn-bó gō͘-cha̍p jī chò keng, í siaⁿ-bó cha̍p-gō͘ im ûi hūi, chài í siaⁿ-tiāu peh im koàn-chhoan tī tiong-kan. Tī Tâi-oân sú-iōng lūi-sū khiuⁿ-kháu ê tē-khu ū Gî-lân, Thô-hn̂g, Ka-gī Sin-káng téng só͘-chāi.