Pang-chān:全壘打

全壘打（英語：Home Run；縮寫：HR），閣號做hőng-bú-láng（日語：ホームラン），是野球運動內底一種槌仔手會使踅所有壘一圈兮安打。除了槌仔手走轉來終點本壘兮時，會家己得着一分以外，所有已經佇壘上兮走壘員逐个攏會使得着一分。

Mark Mcgwire

Hőng-bú-láng兮種類

除了一般兮hőng-bú-láng，佇一寡較特別兮狀況下閣有無仝兮名。

場內全壘打

雖然球無飛出去，但是只要對手無發生失誤、槌仔手摃着球了後直接踅了所有兮壘，佇野手共球傳轉去進前走轉來本壘，嘛算是全壘打；號做「場內全壘打」（英語：inside-the-park home run），一般槌仔手需要是一个走足緊兮選手，而且野手無着是對球兮處理無夠正確、無着是球因為球場兮關係歹處理，對手閣𣍐 (bē)使夆記失誤，若無紀錄上槌仔手着毋是hőng-bú-láng。

滿壘全壘打

滿壘全壘打，閣號做滿貫全壘打、滿壘打、滿貫砲，是指槌仔手佇滿壘兮時陣（一壘、二壘、三壘攏有走壘員）所摃出兮hőng-bú-láng，通一擺直接得着4分。

孤分全壘打

孤分全壘打（Solo Home Run）是指佇壘上無走壘員兮情形所摃出兮hőng-bú-láng，干焦一分打點爾爾。

「首局首打席全壘打」嘛是孤分砲兮一種，因為摃出這款hőng-bú-láng兮槌仔手一定是第一局（無論上、下半局）兮頭一位槌仔手。若第一球着摃出hőng-bú-láng，着是「首局首球首打席全壘打」。

場內滿壘全壘打

槌仔手佇滿壘兮時摃出兮場內hőng-bú-láng，除了野手守備兮問題佮槌仔手本身兮走壘速度以外，壘上走者兮速度嘛有影響。

2021年7月30，富邦悍將范國宸面對樂天桃猿王躍霖摃出場內滿壘全壘打，是中華職棒頭一支。

再見全壘打

再見全壘打（英語：walkoff home run）是指會當馬上共比賽結束掉兮hőng-bú-láng。愛直接結束比賽，需要是後攻球隊佇上尾一局兮下半局摃出hőng-bú-láng，予比數通超前，嘛向對手先攻球隊講「再見」。其中「終極再見滿壘全壘打」（Ultimate Walk-off Grand Slam Home Run）是指佇球隊輸3分兮時摃出的再見hőng-bú-láng。

代打全壘打

負責代打兮槌仔手摃出兮hőng-bú-láng。

Back-to-back

• 連紲二位槌仔手攏摃出hőng-bú-láng兮時，着是back-to-back兮全壘打。
• 連紲三位槌仔手摃出hőng-bú-láng兮時，通叫做back-to-back-to-back。
• 連紲四位槌仔手攏摃出hőng-bú-láng，佇大聯盟史上干焦出現過八改，通叫做back-to-back-to-back-to-back。最近一擺發生佇2017年7月28，國民隊兮Brian Goodwin、Wilmer Difo、Bryce Harper、Ryan Zimmerman連紲4个槌仔手摃出hőng-bú-láng。

完全全壘打

完全全壘打（Home run cycle）是「完全打擊」兮全壘打版本，指球隊佇一場比賽內底出現四種全壘打（孤分、兩分、三分、滿貫）兮狀況，正常情況之下應該是無仝儂合作完成。若球隊達成完全hőng-bú-láng兮時，規場比賽得分上無嘛有10分。

若單一選手完成兮完全hőng-bú-láng誠罕得看着。2019年4月16，美國一个高中生着家己完成完全全壘打。2022年8月11，美國職棒2A聯盟紅雀隊新秀Chandler Redmond嘛完成小聯盟史上頭一擺兮單人完全hőng-bú-láng。

閣看

• 安打

外部連結

Tâi-oân Pāng-kiû Wiki-koán：全壘打(Hàn-gí)