Portal:Gē-su̍t/Selected article/1

Ìn-siōng-phài (Hoat-gí: Impressionnisme), he̍k-chiá kóng Ìn-siōng-chú-gī, sī 19 sè-kí tùi Hoat-kok ê Pa-lí chhōa-thâu hoat-tián ê gē-su̍t ūn-tōng, khí-seng ê sêng-goân sī chi̍t koá hui-chú-liû gē-su̍t-ka. Claude Monet ê chok-phín Ìn-siōng, ji̍t-chhut (Impression, soleil levant) sī "ìn-siōng-phài" chit-ê miâ ê gôan-khí. Ìn-siōng-phài ê goân-thâu chûn-chāi tī chi̍t kóa bô-kâng ê gē-su̍t su-sióng kap ūn-tōng tang-tiong. Tāi-seng sī sī-kak gē-su̍t lāi-bīn ê chū-jiân-chú-gī thoân-thóng, kî-tiong ōe-ka ê khang-khòe hông jīn-ûi sī ài si̍t-chāi piáu-ta̍t hiān-si̍t. Ìn-siōng-phài mā khah koan-sim gē-su̍t-ka pún-sin ê koan-tiám, che koan-hē tio̍h Lô-bān-chú-gī ê éng-hióng. Ē-tàng kóng chū-jiân-chú-gī thê-kiong liáu siá-si̍t ê thoân-thóng; Lô-bān-chú-gī thê-kiong liáu piáu-ta̍t ōe-ka pún-sin koan-tiám ê lí-sióng. Lēng-gōa Barbizon-phài mā tī ōe-bīn ê khì-hun kap kng-sòaⁿ téng hong-bīn éng-hióng Ìn-siōng-phài.