Portal:Siā-hōe/Selected article/1

Chîⁿ sī lâng ēng lâi kah mi̍h-kiāⁿ he̍k-chiá ho̍k-bū sio kau-ōaⁿ ê chi̍t khoán mi̍h. Sè-kan ū chin chē bô-kâng khoán-sek teh si̍t-chè liû-thong ê chîⁿ, sī í chóa-phiò ia̍h gîn-kak téng hêng-sek chûn-chāi, ia̍h to̍h sī hoè-pè, he̍k-chiá kóng thong-hòe. Tōa-hūn ê kok-ka lóng ū hoat in kok sú-iōng ê thong-hòe, pí-lūn Bí-kok ê bí-kim he̍k-chiá sī Hui-li̍p-pin ê peso. Lâng chi̍t-khai-sí sú-iōng chîⁿ ê sî, in siūⁿ-beh chhoē ē tòng-kú, koh thang î-chhi kè-ta̍t, jî-chhiáⁿ lī-piān chah leh kiâⁿ ê hāng-mi̍h, le̍k-sú-siōng thâu-chi̍t-ê ēng kim-sio̍k chù-chò gîn-kak-á ê kok-ka hō-chò Lydia, só͘-chāi tī kin-á-ji̍t Thó͘-ní-kî sai-pō͘, sî-kan sī iok-kî-lio̍k Chêng 650 nî.