Sam-séng Lio̍k-pō͘

Sam-séng Lio̍k-pō͘ (三省六部) sī Tiong-kok kó͘-chá ê tiong-iong koaⁿ-chè. Sam-séng sī Tiong-su-séng, Bûn-hā-séng kap Siōng-su-séng. Lio̍k-pō͘ sī Siōng-su-séng hā-sio̍k ê Lī-pō͘, Hō͘-pō͘, Lé-pō͘, Peng-pō͘, Hêng-pō͘ kap Kong-pō͘. Ta̍k pō͘ koh kok-chū thóng-hat sù-su, ha̍p-chheng jī-si̍p-sù-su (二十四司). Sam-séng Lio̍k-pō͘ sī Se Hàn í-āu tn̂g-kî hoat-tián hêng-sêng ê chè-tō͘. Kî-tiong, Siōng-su-séng tī Tong Hàn hêng-sêng, hit-tang-chūn hō-chò Siōng-su-tâi (尚書台); Tiong-su-séng kap Bûn-hā-séng tī Sam-kok sî-tāi hêng-sêng, bo̍k-tek sī beh hun-koah kap hān-chè Siōng-su-séng ê koân-le̍k. Tī hoat-tián ê kòe-têng tiong, cho͘-chit ê hêng-sek kap koân-le̍k kok ū ián-piàn.